23 тамыз – Құрылтай депутаттарының сайлауы күні Алматы тұрғындары қоғамдық көлікті белсенді пайдаланып жатыр, – деп хабарлайды aqshamnews.kz тілшісі.
Күні бойы қаланың бірқатар бағытында автобус пен троллейбустағы жолаушылар санының артқаны байқалуда.
Бүгін Алматыдағы қоғамдық көліктің барлық түрінде – автобуста, троллейбуста және метрода жол жүру тегін. Мұндай шешім дауыс беру күні қала тұрғындары мен қонақтарының еркін әрі қолайлы қатынауына жағдай жасау мақсатында қабылданды.
Жолаушылар легінің артуына сайлау күніндегі қала тұрғындарының белсенділігі де әсер етіп отыр. Алматылықтар қала ішінде түрлі бағытта қатынап, соның ішінде сайлау учаскелеріне де баруда.
Қоғамдық көлік қалыпты режимде жұмысын жалғастырып жатыр. Тасымалдаушылар мен жауапты қызметтер күні бойы бағыттардағы жағдай мен жолаушы легін бақылауда ұстап отыр.
Алматы қаласының Жол қозғалысы және жолаушылар көлігін ұйымдастыру басқармасы сапарды жоспарлау кезінде жекелеген бағыттардағы жолаушылар санының артуын ескеруді сұрайды.