Әуезов ауданында аумақты күтіп-баптау мен экологиялық бастаманы іске асыру бойынша жүйелі жұмыс істеліп жатыр, – деп хабарлайды aqshamnews.kz тілшісі.
Өңірлік коммуникациялар қызметінде аудан әкімі Абзал Егембердиев осы шаруаларды баяндады.
Ауданның тазалығына 10 мердігер ұйым жауапты, 700-ден астам қызметкер мен 200-ге жуық арнаулы техника күн сайын осы жұмыспен айналысады.
Жұмыс мына аумақтарды қамтиды:
• 256 шақырым көше-жол желісі,
• 129 га жасыл желек,
• 971 аула аумағы.
Биыл 33 мың ағаш кесіледі, оның 5 мыңы қазірдің өзінде өңделді.
Ауданда 248 контейнерлік алаң мен 1 835 контейнер бар.
«Қатты тұрмыстық қалдықтар алаңдарын тазалау күн сайын “Тәртіп” АҚ күшімен жүргізіледі, 30 бірлік арнаулы техника жұмылдырылған. Сондай-ақ қажеттілікке қарай алаңдарды бояп, жуып та шығады», – деді аудан әкімі.
Әкім «Таза Қазақстан» бағдарламасының жүзеге асырылу барысы туралы да айтты. Жыл басынан бері ауданда 10 экологиялық іс-шара өткізілді. 3 мыңнан астам белсенді тұрғын қатысқан 6 сенбілік ұйымдастырылып, шамамен 200 текше метр қоқыс шығарылып, 250 түп ағаш егілді.