Қала әкімі Ерболат Досаев Әуезов ауданын тұрақты электрмен жабдықтау үшін қабылданып жатқан шаралар туралы айтып берді.
Алматы әкімі Ерболат Досаев Әуезов ауданының тұрғындарымен өткен есептік кездесуде электр желілерін жаңғырту туралы айтты, деп хабарлайды almaty-akshamy.kz.
Осылайша биыл 36 км электрмен жабдықтау желілері мен 79 трансформаторлық қосалқы станция, 5 тарату қосалқы станциясын жаңғырту аяқталады. Сондай-ақ, Момышұлы, Шаляпин мен Рысқұлбеков көшелерінде ұзындығы 7 км жаңа электр желілерінің құрылысы басталды.
Сыртқы сапалы жарық жүйесімен қамтамасыз ету бойынша жұмыс жалғасуда: жыл басынан бері 6,5 км кабель желілері мен 806 жарық нүктелері ауыстырылды. 2024 жылдың соңына дейін 310 жаңа жарықтандыру тіректерін орнату, 100 сыртқы жарықтандыруды басқару шкафтарын жөндеу, 35,5 км ескі кабель желілерін және 1700 ескі үлгідегі шамдарды жаңа жарықдиодты шамдарға ауыстыру жоспарда бар.
«Ауданды сапалы сыртқы жарықтандырумен толық қамту үшін осы жылдың наурыз айында сыртқы жарықтандыру желілерінің учаскесін салуға 81 жобалау-сметалық құжаттама әзірлеу басталды. Тамыз айында мемлекеттік сараптаманың қорытындысын алуды жоспарлап отырмыз. Бұл аталған жобаларды іске асыру аудан аумағын 2025 жылдың соңына дейін 100% сыртқы жарықтандырумен қамтамасыз етуге мүмкіндік береді», - деп атап өтті Ерболат Досаев.