Алматы қаласы Наурызбай ауданындағы «Арай» ардагерлер ансамблі «Музыка мен би әлемі – 2026» халықаралық мәдениет және өнер фестивалінде Бас жүлдені жеңіп алды, - деп хабарлайды aqshamnews.kz.
Бұл туралы Алматы қаласы Мәдениет басқармасының өкілдері айтты.
Ұжым халықаралық сахнада қаланың абыройын лайықты қорғап, жоғары деңгейде өнер көрсетті. Фестиваль Қазақстан мен Қытай арасындағы мәдени алмасу аясында ұйымдастырылып, аға буын өкілдерінің шығармашылығына арналды.
Байқау бағдарламасына 18 ұжым қатысты. Қазылар алқасының шешімімен «Арай» ансамблі үздік деп танылып, Бас жүлдемен, дипломмен және естелік мүсіншемен марапатталды. Сондай-ақ ансамбль мүшелеріне алғыс хаттар мен медальдар табысталды.
Фестиваль аясында бірінші орын Алматы қаласының Медеу ауданының ұжымына бұйырды.
Алматы қаласы Мәдениет басқармасының мәліметінше, «Арай» ансамблі қаланың мәдени өміріне белсенді қатысып, Наурызбай ауданын түрлі шығармашылық алаңдар мен іс-шараларда тұрақты түрде таныстырып келеді.