Алматының Алмалы ауданында салық, инвестиция мен тұрғын үйді пайдалануға беру көрсеткіші өсті, – деп хабарлайды aqshamnews.kz тілшісі.
Өңірлік коммуникациялар қызметінде Алмалы ауданының әкімі Арман Шәмшиннің 2026 жылдың алғашқы айларындағы әлеуметтік-экономикалық дамудың қорытындысына арналған брифинг болып өтті.
Спикердің айтуынша, биылғы қаңтар–ақпан айында ауданда негізгі экономикалық көрсеткіш бойынша оң динамика байқалған.
«Бюджетке түскен салық түсімі 220 млрд теңгеден асты, бұл былтырғымен салыстырғанда 8,6%-ға жоғары. Бұл ауданның іскерлігі белсенді екенін, кәсіпкерліктің де дамып жатқанын көрсетеді», – дейді Арман Шәмшин.
Жалпы соманың шамамен 151,4 млрд теңгесі республикалық бюджетке, 68,7 млрд теңгесі жергілікті бюджетке түскен. Жергілікті бюджет бойынша өсім 6,8%-ды құрады.
Сонымен қатар, инвестициялық белсенділік те артқан. Инвестиция көлемі 31 млрд теңгеден асып, былтырғы осы уақытпен салыстырғанда 19,1%-ға өсіпті.
Құрылыс саласында да айтарлықтай өсім тіркелді. Пайдалануға берілген тұрғын үй көлемі 30,4 мың шаршы метрге жетіп, 42,3%-ға артқан.
Бұдан бөлек, ішкі сауда көлемі 17,4%-ға өсіп, 735,7 млрд теңгеге жетті.