2025 жылы 13 қараша күні 110 кВ №124А және №101А электр беру желілерінде жарықтың апаттық өшу тіркелді. Соның салдарынан ПС-162А «Алғабас», ПС-169А «Ақбұлак» және ПС-123А «АЖЭО-2» сынды бірнеше ірі қосалқы станция уақытша электр қуатынсыз қалды, - деп хабарлайды Aqshamnews.kz.
Апат Алматы қаласы Алатау ауданының тұтынушыларына да әсер етті. Электрмен жабдықтау төмендегі шағынаудандарда уақытша тоқтатылды:
Ақбұлақ, Алғабас, Ақкент, Саялы, Теректі, Ғажайып, Көксай, Нұркент, Дарабоз, Зерделі, сондай-ақ Райымбек даңғылы – Момышұлы – Мөңке би көшелерінің аралығындағы аумақ.
Оқиға орнына жедел түрде апаттық-қалпына келтіру бригадалары жіберілді. Мамандар апаттың себебін анықтауға кірісіп, электр қуатын кезең-кезеңімен қалпына келтіру жұмыстарын жүргізді.
14 қараша, сағат 00:12-де, ПС-110/10 кВ №169А «Ақбұлақ» қосалқы станциясы 110 кВ №101А желісі арқылы қайта қосылды. Қазіргі уақытта мамандар Нұркент, Ақкент, Алғабас, Теректі және Көксай шағынаудандарындағы энергиямен жабдықтауды қалпына келтіру жұмыстарын жалғастырып жатыр.
Апаттық-қалпына келтіру жұмыстары электрмен жабдықтау толық орнына келгенше жүргізіледі.
Жауапты мекеме уақытша қолайсыздық үшін кешірім сұрайды.
Еске сала кетейік, кеше кешкісін Алматы қаласының Алатау ауданында электр беру желілерінде апаттық жағдай болып, «Ақбұлақ», «Алғабас», «Ақкент», «Саялы», «Теректі», «Ғажайып», «Көксай», «Нұркент», «Дарабоз», «Зерделі» шағынаудандары және Райымбек даңғылы – Момышұлы – Мөңке би көшелерінің арасындағы аумақ электр жарығынсыз қалды.