Алатау ауданында 2026 жылдың соңына дейін жалпы сыйымдылығы 4 300 орындық төрт мектепті ашу жоспарланып отыр, – деп хабарлайды aqshamnews.kz тілшісі.
Бұл туралы аудан әкімдігінің өкілдері айтты.
Жаңа оқу жылында Зерделі шағынауданындағы 550 орындық №178 лицей, Ақмаржан шағынауданындағы 2 мың орындық №230 мектеп және Ғажайып шағынауданындағы 1 200 орындық жаңа мектеп оқушыларды қабылдайды. Ал Қарасу шағынауданындағы №160 мектепті биылғы қараша айында пайдалануға беру жоспарланған.
Саялы шағынауданында тәулігіне 200 келушіге арналған отбасылық дәрігерлік амбулаторияның құрылысы аяқталды. Сондай-ақ мұнда балаларды үйірмелерге қабылдау жүргізіліп жатқан Инновациялық шығармашылық орталығы салынды.
Инженерлік инфрақұрылымды дамыту жұмыстары жалғасуда. 2026 жылы Рахат–Мәдениет және Шапағат шағынаудандарында ұзындығы 177,8 шақырым болатын су құбыры мен кәріз желілерін пайдалануға беру жоспарланған. Бұл шамамен 19 мың тұрғынды инженерлік қызметтермен қамтамасыз етуге мүмкіндік береді. Теректі шағынауданында қосымша 92,2 шақырым инженерлік желі салынып жатыр.
Сонымен қатар жалпы ұзындығы 61,1 шақырым болатын 95 көшеде орташа жол жөндеу жұмыстары жүргізілуде. Ұзындығы 3,2 шақырым болатын Саин көшесі аумағының құрылысы аяқталды. Боралдай, Рахат–Мәдениет және Теректі шағынаудандарында жұмыстар жалғасуда.