Алматы циркінің әртістері Гиннестің рекордтар кітабына енді
Отандық цирк өнері үшін нағыз жеңіс. Алматы циркінің әртістері, әйгілі «СЕРБАТ» акробатикалық тобының мүшелері – Батыр Жанұзақ пен Марлен Маратов Миландағы беделді «Lo Show Dei Record» халықаралық шоуында бірегей рекорд орнатып, Гиннестің рекордтар кітабына енді. Бұл туралы Алматы қаласының өңірлік коммуникациялар қызметінің баспасөз конференциясында рекордсмендердің өздері хабарлады.
Италияда олар баспалдақтан төңкеріліп түскен адаммен бірге ең қиын трюкті 36,66 секундта орындаған. Бұл жетістік көрермендерді ғана емес, халықаралық қазылар алқасын да таңғалдырды. Ол алматылық акробаттардың ерекше даярлығының, ептілігі мен шеберлігінің символына айналды.
«Бұл керемет сәт болды. Біз бұл рекордқа ұзақ және табандылықпен дайындалдық. Бүкіл залдың қол шапалақтағанын көру – ұмытылмайтын ерекше сәт болды!», — деді, рекордсмен, атақты «СЕРБАТ» акробатикалық тобының мүшесі Батыр Жанұзақ.
«Біз үшін бұл жай ғана рекорд емес, бұл бүкіл командамыздың еңбегіне, цирк өнеріне деген махаббатына берілген баға. Бізге сенген барлық жанкүйерлерге алғысымыз шексіз!», — деп толықтырды Алматы циркінің рекордсмені Марлен Маратов.
«СЕРБАТ» цирк тобы ұзақ уақыт бойы әлемдік сахнада танылып, «America's Got Talent», «Britain's Got Talent» және «China’s Got Talent» сияқты белгілі шоулардың финалистері мен жеңімпаздары болды.
Олардың қойылымы әрқашан бірегейлігімен, шеберлігімен және жоғары техникалық деңгейімен ерекшеленді.
«Біз өнерпаздарымызбен мақтанамыз. Бұл рекорд – жеке жетістік қана емес, сонымен қатар қазақ цирк өнерінің дамуына қосылған зор үлес. Енді Қазақстанда нағыз цирк шеберлері бар екенін бүкіл әлем біледі», — деді Қазақ мемлекеттік циркінің директоры Мақсат Жайықов.
Оның айтуынша, бұл рекорд қазақстандық әртістердің деңгейі жоғары екенін дәлелдеп, Алматы циркінің халықаралық аренадағы беделін нығайтуға жасалған тағы бір қадам болды.