Бүгін, қала күнінде алматылықтар Қазақ мемлекеттік циркінің ұйымдастыруымен өткен «Шапито» бағдарламасын тамашалады.
Ерекше цирк бағдарламасы Тұңғыш Президент саябағында сағат 12:00 және 15:00-де өтті. Көшпелі форматта ұйымдастырылған цирк алматылықтар мен қала қонақтарына ерекше әсер қалдырды.
Ұйымдастырушылардың сөзінше екі рет қойылған бағдарламаға 500-ге жуық адам тамашалаған. Олардың басым бөлігі балалар.
Көрермендерге акробаттар, әуе гимнасттары, жонглерлер, шебер эквилибристер және көңілді сайқымазақтар өнер көрсетіп, көтеріңкі көңіл-күй сыйлады.
Сондай-ақ көрермендер фантастикалық мультимедиялы шоу тамашалады. Жарқыраған жарық эффектісі, ерекше LED-костюмдер және интерактивті көріністер цирк аренасында ертегі әлемінде жүргендей сезім қалдырды.
Бүгін, 21 қыркүйекте Қала күніне орай өтіп жатқан мерекелік іс-шаралардың мазмұны сан алуан. Әсем мегаполистің әрбір саябағы көңілді мерекелік бояуға толды.