Алматыда Ұлттық ұланның 5571 әскери бөлімінің әскери қызметшілері мен Ардагерлер кеңесі тыл ардагері, отставкадағы майор Ғалымжан Бакешев ақсақалға сәлем бере барды.
Соғыстың «балалары» – бұл балалық шағы Ұлы Отан соғысы жылдарымен тұспа-тұс келген адамдар. Олар қолына қару ұстап майданда соғыспаса да, тағдыры соғыспен тығыз байланысты болды. Бұл балалар аштықты, қарша бораған бомбалардың қорқынышын, үрейін бастан өткерді. Жақындарын соғыс жалмады. Бала да болса Жеңісті жақындатамыз деп, бұқанасы бекімей жатып тылда ауыр еңбек етіп, қиыншылықмен өсті.
Соғыс басталғанда Ғалымжан ата небәрі алты жаста еді. Оның да балалық шағын соғыс ұрлаған болатын. Ол да еңбекке ерте араласып, ауылдағы ер-азаматтардың орнын басты, аналарымен бірге тылда еңбек ете жүріп, Жеңіске үлес қосты.
Қазір соғыс жылғы балалар тыл ардагерлеріне теңестірілген. Өйткені олардың көбі кішкентай жасынан майданға кеткен ересектердің орнын басып, зауыттарда, колхоздарда жұмыс істеді, сарбаздарға жылы киім тоқыды. Ғалымжан ақсақалға да осы мәртебе берілген. Сонымен қатар, Ғалымжан Жүнісұлы – Ұлттық ұланның қарт ардагерлерінің бірі. Ол 1960 жылдан бастап КСРО-ның Ішкі әскерінде әр түрлі қызметтерде болған. Ішкі әскер басқармасында саясат бөлімінің нұсқаушысы лауазымында зейнетке шыққан.
Бүгінде Ұлттық ұланда «Жеңіске 100 күн қалғанда» акциясы жүріп жатыр. Осы іс-шара аясында соғыс және тыл ардагерлері үшін көптеген игі істер атқарылып жатыр. Ұландықтар Ғалымжан ата мен Қоныскүл апаға арнайы әкелген сыйлықтарын табыстап, сырнайларымен ән салып, қарттарға көтеріңкі көңіл күй сыйлап кетті.