«Заң мен тәртіп» қағидаты аясында Алматы қаласы Қоғамдық даму орталығының қолдауымен Халықаралық ақпараттық технологиялар университетінде студенттермен маңызды кездесу өтті. Іс-шараның тақырыбы – «Жеке бостандық құқығы: құқықтық негіздері және зорлық-зомбылық, сталкинг пен некеге мәжбүрлеу үшін жауапкершілік».
Кездесуге прокуратура органдарының, адвокаттық қауымдастықтың және құқық саласының өкілдері спикер ретінде қатысып, жастарға жеке бостандық пен жеке тұлға құқықтарының мәні мен маңызын жан-жақты түсіндірді.
Іс-шараның негізгі мақсаты – студенттердің құқықтық сауаттылығын арттыру, зорлық-зомбылық, сталкинг және некеге мәжбүрлеу әрекеттері үшін заңнамада көзделген жауапкершілік шараларын, сондай-ақ құқықтық қорғану тетіктерін кеңінен таныстыру болды. Кездесу барысында жеке бостандықты қорғаудың құқықтық аспектілері талқыланып, қолданыстағы заң нормалары және құқыққа қайшы әрекеттер үшін қарастырылған жауапкершілік түрлері нақты мысалдар арқылы түсіндірілді.
Шара интерактивті форматта өтіп, студенттер өздерін толғандырған сұрақтарын қойып, кәсіби мамандардан мазмұнды әрі нақты жауап алды. Мұндай ашық диалог жастардың құқықтық мәдениетін қалыптастыруға, азаматтық жауапкершілігін күшейтуге және құқық бұзушылықтың алдын алуға ықпал етеді.