Алматылық спортшы Нұрмұхаммед Жайылбай Бразилияда өтіп жатқан жасөспірімдер мен кадеттер арасындағы семсерлесуден әлем чемпионатында қола жүлдегер атанды, – деп хабарлайды aqshamnews.kz тілшісі.
Алматы қаласы Спорт басқармасының мәліметінше, бұл Қазақстан тарихындағы айтулы жетістік. Атап айтқанда, елімізде алғаш рет осы жас санатындағы әлем чемпионатында жеке сын бойынша жүлде алынған.
Нұрмұхаммед Жайылбай турнирді Халықаралық семсерлесу федерациясының (FIE) рейтингінде 25-орыннан бастап, жарыстың барлық кезеңінде сенімді өнер көрсетіп, қарсыластарынан басым түсті.
1/64 финалда алматылық спортшы Сенегал өкілін жеңді, 1/32 финалда Венгрия спортшысынан тізе бүктірді, 1/16 финалда Жапония өкілінен басып түсті. 1/8 финалда Ресей спортшысын ұтып, ширек финалда АҚШ өкілін шаң қаптырып, жартылай финалға жолдама алды.
Жартылай финалда Нұрмұхаммед Жайылбай Еуропаның қазіргі чемпионы әрі әлемдік рейтингтің көшбасшысы түркиялық Фуркан Яманмен күш сынасты. Тартысты өткен жекпе-жек қорытындысы бойынша қазақстандық спортшы 13:15 есебімен қарсыласына есе жіберіп, әлем біріншілігінің қола жүлдегері атанды.
Айта кетейік, бұған дейін қазақстандық спортшылар әлемдік деңгейдегі жарыстарда жүлдеге бір табан жақындағанымен, дәл Нұрмұхаммед Жайылбай алғаш рет жасөспірімдер мен кадеттер арасында жеке есепте медаль жеңіп алды.
Бұл жетістік Қазақстандағы семсерлесу спортының қарқынды дамып келе жатқанына айқын дәлел. Сонымен қатар, ол алматылық спорт мектебінің әлеуеті жоғары екенін көрсетеді.