Қазақстан халқының тілдері күніне орай 2 қыркүйекте Түркістан қаласында ерекше мазмұндағы байқау өтті. Ғылым және жоғары білім министрлігінің Тіл саясаты комитеті ұйымдастырған республикалық «Тіл шебері – 2025» байқауы биыл да ел ішіндегі үздік тіл меңгерген мемлекеттік қызметшілерді анықтады.
Үш тілді еркін меңгерген қызметкерлер арасындағы бұл байқауға еліміздің әр өңірінен іріктеліп алынған 15 қатысушы жиналды. Олар қазақ, орыс және ағылшын тілдеріндегі білім-білік деңгейлерін жан-жақты көрсетіп, өзара бақ сынасты.
Байқау үш кезеңнен тұрды. Алғашқы кезеңде үміткерлер қазақ тіліндегі сирек қолданылатын сөздердің мағынасын ашып, бай тілдік қорларын танытты. Екінші кезеңде орыс тілінде еліміздің географиясы мен ұлттық құндылықтары жайлы сұрақтарға жауап берсе, соңғы кезеңде ағылшын тілінде Қазақстанның танымал тұлғалары мен салт-дәстүрлері туралы өз көзқарастарын ортаға салды.
Тіл мамандары мен әртүрлі саланың кәсіби сарапшыларынан құралған әділқазылар алқасы қатысушылардың тілдік құзыретін, сөйлеу мәдениетін, ой жүйелеу қабілетін және шешендік шеберлігін бағалады.
Нәтижесінде, байқаудың бас жүлдесін Алматы қаласы әкімі аппараты тілдерді дамыту және ономастика бөлімінің бас инспекторы Нұрғазы Ардақ Әділғазықызы жеңіп алды.
Екінші орын Қызылорда облысы Дін істері басқармасының бөлім басшысы Бердібек Нұрхатқа бұйырды. Ал үшінші орынды Қостанай облысы Тексеру комиссиясының бас инспекторы Жақсан Рауан мен Орал қаласы Зачаган кенті әкімі аппаратының бас маманы Мұханбетқалиев Дәулетжан бөлісті.
Бұл байқау – мемлекеттік тілдің мәртебесін арттырумен қатар, көптілділік мәдениетін дамытуға бағытталған игі бастама. Сонымен бірге, түрлі салада еңбек етіп жүрген мемлекеттік қызметшілердің жан-жақты білімді, тілге деген сүйіспеншілігі бар екенін айқындады.
Тіл – ұлттың жаны. Ал оны қадірлей білген азамат – елдің шын жанашыры. Осындай байқаулардың басты мақсаты да – тілге деген құрметті арттырып, көптілді азаматтық қоғамның қалыптасуына үлес қосу.