Алматылық «Қайрат» пен кипрлік «Пафос» арасындағы матч алдында Орталық стадионға алғашқы жанкүйерлер келе бастады. Көрермендер әлі толық жиналып үлгермесе де, алматылықтар өз әсерлерін бөлісіп, мұндай халықаралық деңгейдегі ойынның дәл Алматыда өтуі - үлкен мақтаныш екенін айтты, - деп хабарлайды Аqshamnews.kz тілшісі.
Жанкүйер Константиннің сөзінше, бүгінгі кездесу тек спорттық нәтиже үшін емес, Алматының халықаралық мәртебесін айшықтауы тұрғысынан да маңызды:
"Біз ерекше кезеңде өмір сүріп жатырмыз - Алматы халықаралық спорт аренасына айналды. Бұрын мұндай матчтарды көру үшін Еуропаға бару керек еді, ал қазір Еуропаның өзі бізге келіп отыр. Бұл - қаламыз үшін үлкен мәртебе. Өз стадионымызда осындай сәтке куә болу – үлкен қуаныш", - дейді ол.
Ал тағы бір жанкүйер Асанәлі бұл кездесудің тек спорттық емес, рухани мәні бар екенін атап өтті:
"Бұл жай ғана матч емес — Алматыға деген құрметтің белгісі. Мұндай ойындар біздің қаламыздың дамып келе жатқанын, Еуропадан қонақтар қабылдап, үлкен футбол тарихының бір бөлігіне айналып жатқанымызды көрсетеді. Біз "Қайратқа“ сенеміз және мұның бәрі дәл осы әдемі қалада өтіп жатқанына қуаныштымыз", - деді ол.
Стадион әлі тола қоймағанымен, әр жанкүйердің сөзі мен көңіл күйінен қаласына деген сүйіспеншілік пен «Қайратқа» деген сенім айқын сезіледі.
