Алматының №7 қалалық клиникалық ауруханасы жанындағы емханада дәрігер-фтизиатр Қаракөз Өтемұратова, СӨС кабинетінің мейірбикесі Асылажар Жанғазиева және «Баланы дамыту бөлмесінің» мейірбикесі Хәлидам Юсупова «Манту сынамасы», «БЦЖ вакцинасы» тақырыптарында ақпараттық-түсіндіру жұмысын жүргізді.
Дәрігерлер Манту сынамасына сезіктене қарамауға шақырады. Бұл – диагностикалық сынама.
– Манту реакциясы – бұл ағзаның арнайы затты, туберкулинді енгізуге реакциясын бағалау, яғни бұл туберкулезге қарсы иммунитетті және оның ауырлық дәрежесін бағалау әдісі. Манту реакциясы кезінде адамға туберкулезді жұқтыру мүмкін емес, туберкулезде Кох таяқшалары жоқ. Сондай-ақ, БЦЖ вакцинасы туралы да айта кетсек, балаға салынған БЦЖ екпесінен кейінгі жағымсыз реакциялар өте сирек кездеседі (0,02%). Мұндай жағдай, ең алдымен, баланың иммунитеті төмендеген кезде көрініс беруі мүмкін, – дейді №7 қалалық клиникалық аурухана жанындағы емхананың фтизиатры Қаракөз Өтемұратова.
Жаңа туған нәрестелерге БЦЖ вакцинасын келесі жағдайларда жүргізуге тыйым салынады: бөбектің салмағы екі келіден аз немесе 33 апта толмай туған болса; нәресте жатырішілік инфекциямен туған жағдайда; анасына АИТВ инфекциясы диагнозы қойылса; иммунитет тапшылығы байқалса; орталық жүйке жүйесі зақымданса.
Осы ретте профилактикалық (алдын ала) емдеу туралы да айта кетсек. Туберкулезге шалдығу қаупі бар адамдарға (туберкулезбен ауыратын науқастармен қатынаста болған; Манту және Диаскинтест алғаш рет оң реакция берген балалар мен жасөспірімдер) препараттар қолданылады, яғни химиялық профилактика жасалады. Бұл – қауіпті аурумен күресудің ең тиімді әдістерінің бірі. Туберкулезге қарсы препарат сау адамның ағзасына түскен туберкулез микобактерияларының көбеюін тежейді және ауру дамымайды.
Иә, химиопрофилактика – бұл емдеу емес, туберкулездің дамуына қарсы қорғаныс. Алдын алу курсы МСАК медицина қызметкерлерінің бақылауымен 3 айдан 6 айға дейін созылады.