Хадиша Бөкеева атындағы Батыс Қазақстан облыстық қазақ драма театры Алматы қаласына гастрольдік сапармен келе жатыр, - деп хабарлайды Аqshamnews.kz тілшісі.
Тәуелсіздік алғаннан кейін құрылған театрлардың бірі — Батыс Қазақстан облысындағы Хадиша Бөкеева атындағы қазақ драма театры. Хадиша театры ұлттық сахна өнерінің ұлы көшбасшылары салған жолдағы ұлағатты да дәстүрлі үрдіс құндылықтарды сақтай отырып, шығармашылық жаңа белестерге жету жолында, ізденіс қарымын жан-жақты шыңдап келеді. Мемлекеттің рухани-мәдени кеңістігінде аянбай еңбек етіп жүрген өнердің қара шаңырағы.
Аталмыш ұжым 2025 жылдың 7, 8, 9, 10 қазан күндері Алматы қаласында гастрольдік сапарда болады. Өнерсүйер қауымға театр репертуарындағы таңдаулы классикалық, әлемдік және заманауи драматургиядан үздік қойылымдарын және кішкентай көрермендерге арналған ертегілерін ұсынады. Сонымен қатар биылғы жылы рухты ақын Жұбан Молдағалиевтің 105 жылдығы мен Нұрғиса Тілендиевті 100 жылдығы аясында тұлғалардың асыл мұрасын насихаттап, жас буынға елдік рух пен мәдени құндылықты жеткізу мақсатында қойылған спектакльдер де бар.
Әр қойылым – сахнадағы шынайы сезім, актерлік шеберлік пен көркемдік ізденістің тоғысы.
Гастрольдік сапар – өнер арқылы өңірлер арасындағы мәдени байланысты нығайту, қазақ театр өнерін кеңінен дәріптеп одан әрі дамытуға үлес қосатын игі қадам болмақ.
ГАСТРОЛЬДІК ҚОЙЫЛЫМДАР КЕСТЕСІ:
7, 9, қазан 11.00 - А.Аламан «ЖАЛҚАУДЫҢ ЖЫРЫ» ертегі
8, 10 қазан 11.00 –О.Әубәкіров «МЕН ЧЕМПИОН БОЛАМЫН» ертегі
7 қазан 18.30 – А.Бақтыгереева, М.Омарова «ЖҰБАН» поэтикалық драма
8 қазан 18.30 – А.Володин «СЕНІ САҒЫНДЫМ» психологиялық драма
9 қазан 18.30 – Н.Сауданбекұлы «МҰҚАҒАЛИ-НҰРҒИСА» драма
10 қазан 18.30 — Н.В.Гоголь «РЕВИЗОР» комедия
ӨТЕТІН ОРНЫ: Ғ.Мүсірепов атындағы Қазақ Мемлекеттік Академиялық балалар мен жасөспірімдер театры. Алматы қаласы, Абылайхан даңғылы, 38
