Алматыға Қытайдың Харбин қаласында өтіп жатқан Азия ойындарының жеңімпазы мен жүлдегерлері оралды, деп хабарлайды aqshamnews.kz тілшісі.
Олардың қатарында - Шерзод Хаширбаев, Асылхан Асан, Евгений Кошкин, Аяна Жолдас, Ардана Маханова, Кристина Силаева бар.
Алматы халықаралық әуежайында Харбин қаласынан қанжығалы келген қазақстандық спортшыларды салтанатты қарсы алу рәсімі болды. Оған қала әкімшілігінің өкілдері, жанкүйерлер мен спортшының туған-туыстары қатысты.
"Мен 100 метрде әрдайым сәтті өнер көрсетемін. Сондықтан әу бастан жүлде алам деген мақсат қойдым. Бұл қашықтыққа арнайы дайындалдым. Жапондықтар бұл жарыста менің басты қарсыластарым болды", - деді 100 метрге конькимен жүгіруден қысқы Азия ойындарының күміс жүлдегері Евгений Кошкин.
Ал Евгений Кошкиннің жеке бапкері Федор Мезенцев бұл нәтижеден кейін шәкіртінен үлкен үміт күтетінін айтты.
"Евгений осы қысқы Азия ойындарына Ұлттық құрамамен бірге дайындалды. Ол өте жылдам спортшы. Азиада бағдарламасына 100 метрлік қашықтықты енгізген кезде жүлде алуға мүмкіндік бар екенін білдік. Себебі ол өте тез жылдамдық жинайды. Олимпиада туралы әзірге болжам айту қиын. Бірақ дәстүрлі түрде конькимен жүгіруден Азия спортшы алда болатынын ескерсек, төртжылдық басты жарысында да бәсекеге түсуге әбден мүмкіндік бар", - деді Федор Мезенцев.