«Halyk» қайырымдылық қоры Халықаралық қарттар күніне орай Алматы қаласы Жұмыспен қамту және әлеуметтік бағдарламалар басқармасына қарайтын «Шаңырақ» әлеуметтік қызмет орталығында мерекелік концерт ұйымдастырды.
Қариялар алдында «Мирас» халықаралық мектебі, Алматы Халықаралық мектебі және «Арыстан» мамандандырылған лицейiнің оқушылары мен ҚР еңбек сіңірген қайраткерлері Медеу Арынбаев пен Сұлушаш Нұрмағамбетова өнер көрсетті.
«Біз әрдайым үлкенге құрмет көрсетуді естен шығармаймыз. «Қарты бар елдің қазынасы мол» дегендей, бұндай іс-шаралар өскелең жас ұрпаққа үлгі болары сөзсіз. "Halyk" қорының қолдауы бұл кісілердің көңіл-күйін көтеріп, өмір сүруге деген құштарлығын, күш-қуатын арттырады деген үміттеміз. Біздің мақсатымыз – қарияларға деген ыстық ықыласымызды, біз әрдайым өздерімен бірге екенімізді білдіру», - дейді Halyk қорының директоры Сағынбек Шүңкеев.
Мереке соңында «Halyk» қайырымдылық қоры көпбалалы аналар мен мүгедектер қауымдастығындағы кәсіпкерлерден 305 жастық пен 305 көрпе сатып алып, орталықтағы қарттарға сыйға тартты.
Айта кетейік, бұл іс-шара «Halyk» қайырымдылық қорының еліміздің түкпір-түкпіріндегі мұқтаж жандарды қолдауға және халықтың өмір сүру жағдайын жақсартуға бағытталған жобаларының бірі. Аталған қор осы күнге дейін 120-дан астам әлеуметтік жобаны жүзеге асырып, 85 миллиард теңгеге көмек көрсетті.