Алматыдағы Республика алаңы ауқымды жаңғырту жұмыстарынан кейін қайта ашылды. Қаланың басты қоғамдық кеңістіктерінің бірі саналатын аумақ толық абаттандырылып, тұрғындар мен қала қонақтарының жайлы демалысына лайық заманауи келбетке ие болды, – деп хабарлайды aqshamnews.kz тілшісі.
Жоба аясында жаяу жүргіншілер жолы жаңартылып, инженерлік желілер мен жарықтандыру жүйесі толықтай ауыстырылды. Сонымен қатар субұрқақтар, балалар ойын алаңдары, демалыс орындары, амфитеатрлар веложолдар салынды.
Алаңды жаңарту барысында көгалдандыру жұмыстарына ерекше көңіл бөлінген. Аумаққа 233 ірі ағаш, 63 мыңнан астам бұта және 17,7 мың көпжылдық өсімдік отырғызылып, автоматты суару жүйесі іске қосылған. Кешкі уақытта аумақ сәулеттік жарықтандырумен безендіріліп, тұрғындардың қауіпсіздігі үшін жаңа шамдар орнатылған.
Алматы қаласы Қоғамдық кеңістіктерді дамыту басқармасының басшысы Батырхан Сүлейменовтің айтуынша, Республика алаңындағы құрылыс үш айда толық аяқталған.
– Құрылыс жұмыстары толық аяқталып, нысан пайдалануға берілді. Қазіргі таңда Сәтбаев көшесін кешенді абаттандыру жобасы жүзеге асырылып жатыр. Сол жобаның құрамына Республика алаңы да енгізілген болатын. Мұнда кешенді көгалдандыру жүргізіліп, жүздеген ағаш пен ондаған мың бұта отырғызылды. Инженерлік инфрақұрылым жаңартылып, тұрғындар үшін жайлы әрі заманауи қоғамдық кеңістік қалыптастырылды, – деді басқарма басшысы.
Қала басшысының тапсырмасына сәйкес жүзеге асырылған бұл жоба қоғамдық кеңістіктерлі дамтыу, тұрғындардың өмір сүру сапасын арттыруға бағытталған. Нәтижесінде Республика алаңы қала тұрғындары мен қонақтары үшін жайлы, қауіпсіз әрі заманауи демалыс кеңістігіне айналып отыр.