Алматыдағы Әбілхан Қастеев атындағы Мемлекеттік өнер музейінде ауқымды жөндеу-қалпына келтіру жұмыстары басталды. Бұл туралы ҚР Мәдениет және ақпарат министрі Аида Балаева мәлімдеді, деп хабарлайды Аqshamnews.kz тілшісі.
Министрдің айтуынша, мәдени нысандарды жаңғырту мен сақтау бағытындағы мемлекеттік бағдарлама аясында іске асырылып жатқан жоба музейді заманауи талаптарға сай қайта жабдықтауға бағытталған.
"Жаңғырту шеңберінде шатырды ауыстыру, заманауи климаттық жүйелер орнату, паркет жабындысын қалпына келтіру және өзге де маңызды техникалық жетілдірулер көзделген. Бұл шаралар келушілер үшін барынша қолайлы жағдай жасап, өнер туындыларын сақтаудың заманауи талаптарын қамтамасыз етуге бағытталған" делінген министр жазбасында.
5 тамыздан бастап музей уақытша жабылды. Мұндай шешім құндылықтарды сақтау мен құрылыс кезеңіндегі қауіпсіздікті қамтамасыз ету үшін қабылданған.
"Осы маңызды жобаны жүзеге асыруға қолдау көрсеткен Senim Qogamy қоры мен бас демеуші "Самұрық-Қазына" АҚ-на шынайы алғысымызды білдіреміз. Жөндеу жұмыстарын мердігер ұйым – "Lucky Build Company" ЖШС атқарып жатыр" деп қосты Балаева.
Барлық жұмыс аяқталған соң, жаңарған Қастеев музейі қонақтарын жаңа заманға сай кеңістікте, шабыт сыйлайтын атмосферада қарсы алатын болады.