Өңірлік коммуникациялар қызметінде өткен брифинг барысында «Алматы қаласының Отбасын қолдау орталығы» КММ-нің қала тұрғындарына дағдарысты еңсеріп, отбасын сақтауға қалай көмектесіп жатқанына мысал келтірді. Орталықтың директоры міндетін атқарушы Ақмолжан Зариповтың айтуынша, олар көмек көрсетіп қана қоймай, отбасылық байланысты да қалпына келтіріп, азаматтардың өмір сүру сапасын арттыруға да атсалысады, – деп хабарлайды aqshamnews.kz тілшісі.
«Біздің мақсатымыз – отбасына дағдарыстан шығуға көмектесіп, оны әлеуметтік құндылық ретінде сақтау», – дейді ол.
Көрнекті мысалдың бірі – жаңа туған нәрестеден бас тартқан жас анамен жүргізілген жұмыс. Психологиялық қолдау мен сүйемелдеудің нәтижесінде әйел райынан қайтып, баласын қайтарып алып, оны өз бетінше тәрбиелеуге кірісті. Сонымен қатар, Орталық әлеуметтік және медициналық мәселелерді шешуге де жәрдемдеседі. Мәселен, Алматы қаласының бір тұрғынына көру қабілеті бойынша мүгедектік рәсімдеуге көмектесіп, соның арқасында ол тиісті мемлекеттік төлемдер мен ем алуға мүмкіндік алған.
Ал басқа жағдайда көпбалалы отбасыға баланың мүгедектік тобын күшейтуге жәрдем беріліп, бұл мемлекеттік қолдауға қолжетімділікті кеңейтті. Жұмыспен қамту бағыты да маңызды орын алады. Орталықтың көмегімен көпбалалы ана күтуші-тәрбиеші болып жұмысқа орналасты. Әлеуметтік қолайсыздықтың алдын алу – негізгі бағыттың бірі. Орталық полиция, білім беру мен медициналық ұйымдармен бірлесіп, ақпараттық науқандар мен оқыту іс-шараларын да өткізеді.
«Кеңес беруден бастап сүйемелдеуге дейінгі кешенді тәсіл нәтижедлі екенін көріп отырмыз. Адамдар қазір жүйеге сенім артып, көмекке жүгініп жатыр», – дейді спикер.