Алматының Әуезов ауданындағы "Мамыр-4" шағынауданында су құбыры мен кәріз желілерінің құрылысы аяқталды. Жобаны жүзеге асырған мердігер ұйым Абай даңғылы, Б. Момышұлы, Саин және Мұстай Кәрім көшелері арасындағы аумақта инженерлік коммуникация жүргізу жұмыстарын тәмамдап, жол төсемін толық қалпына келтірді.
Құрылыс жұмыстары аясында 6,5 шақырым су құбыры және 5,8 шақырым кәріз желісі салынып, барлық жұмыс қазіргі заман талаптарына сай орындалды. Инженерлік желілердің жобаланып, монтаждалуынан кейін шағынаудандағы жол төсемі толықтай жаңартылды.
2025 жылы Әуезов ауданында коммуналдық инфрақұрылымды жаңғырту жұмыстары жалғасып келеді. Ауданда су және кәріз жүйелерін жақсартуға бағытталған төрт ірі жоба жүзеге асырылып жатыр.
Соның ішінде ең ауқымды жобалардың бірі Саин – Яссауи – Шаляпин – Жандосов көшелері аумағындағы инфрақұрылымды жаңарту. Бұл аумақта жұмыс екі кезең бойынша жүргізіліп, жалпы ұзындығы 49 шақырым инженерлік желі тартылып жатыр.
Бұған қоса, "Достық" шағынауданында мердігер ұйым құрылыс жұмыстарының негізгі бөлігін аяқтады. Қалған жұмыс 2026 жылы бітеді деп жоспарланып отыр.
