Олардың пікірінше, партия барлық реформалардың ұйытқысы болуы керек.
Алматыдағы этномәдени бірлестіктердің өкілдері билік партиясы өз жұмысын қоғам сұранысына сай қайта құрады деген ойда, деп хабарлайды Almaty-akshamy.kz.
1 наурыз - Алғыс айту күні және партияның құрылған күні кезектен тыс съезд өтті. Бұл шара ұйымды жаңғырту мәселелеріне арналды. Ал Алматыдағы қалалық ұйғыр мәдени орталығының өкілдері Мемлекет басшысы қоғамға қажетті көптеген бастамаларды көтеріп отыр деп есептейді.
«Алматы қалалық ұйғыр мәдени орталығы» қоғамдық бірлестігі төрағасының орынбасары Махинұр Исраилова партия барлық реформалардың ұйытқысы болуы керек деп санайды.
- Мен қоғам қайраткері және Алматы қаласы ҚХА мүшесі ретінде бұл бастаманы қолдаймын және бұл партияның жаңа табыстары мен жетістіктерінің бастауы болады деп есептеймін. Ерлан Қошановтың: «Ұйым қызметін жаңа мағынамен толықтыру үшін қажетті өзгерістерді енгізу керек. Осыған байланысты партия атауын өзгертуді дұрыс деп санаймыз. Қазақстанның билік партиясына ата-бабамызға тағзым ретінде Аманат атауын беруіміз керек» деген пікірімен келісемін, - дейді Махинұр Исраилова.
Оның әріптесі, «Алматы қалалық ұйғыр мәдени орталығы» қоғамдық бірлестігі төрағасының орынбасары Мұрат Хизметов партия жұмысы, оның бағыттары мен ұстанымдары қоғам сұранысына сай қайта құрылады деп есептейді.
Ол сондай-ақ партияны қайта құру бойынша айтылған ұсыныстарды қолдап отыр. Сонымен қатар Мұрат Хизметов Президент ұсынған идеялар мен ұсыныстарды жинақтау бойынша республикалық акция ұйымдастыру арқылы әрбір қазақстандыққа жалпыұлттық күн тәртібін қалыптастыруға, атсалысуға мүмкіндік береді деген пікірде.