Анель Сартаева жол қозғалысы ережелерін бұзды деп айыпталып отыр, деп хабарлайды aqshamnews.kz.
Естеріңізде болса, оқиға жазда Сейфуллин және Мақатаев көшелерінің қиылысында болды. Жол көлік оқиғалары салдарынан бір жолаушы қайтыс болып, 20-дан астам адам зардап шекті.
Соттағы соңғы сөзінде Сартаева өзін бас бостандығынан айырмауды сұрады. Өйткені, ол тоғыз айлық қызын тәрбиелеп отыр. Сондай-ақ, ол жол-көлік оқиғасына толық кінәлі екенін мойындап, шын жүректен өкінетінін жеткізді.
Алматылық әйел өзінің отбасы зардап шеккендерге келтірілген зиянды ерікті түрде өтеп, олардан кешірім сұрағанын жеткізді.
«Қайтыс болған адамның отбасына көңіл айтып, кешірім сұрағым келеді. Сіздердің адамгершіліктеріңізге, ұстанымдарыңыз бен кешірімдеріңізге ризамын. Соттан мені қатты жазаламауды сұрағандарыңыз үшін алғыс білдіремін!», -деді.
Сондай-ақ, ол қоғамға ешқандай қауіп төндірмейтінін және әрдайым заңды құрметтегенін айтты.
«Бұл жол көлік оқиғасы менің абайсыздығымнан болды. Соттан үкім шығарар кезде істің жеңілдететін жағдайларын ескеруді сұраймын», – деді айыпталушы.
Үкім ертең, 29 қараша күні сағат 11:00-де жарияланады.