Алматыдағы Алмалы ауданында екі медициналық нысан, оңалту орталығы мен жаңа мектептер ашылады, – деп хабарлайды aqshamnews.kz тілшісі.
Өңірлік коммуникациялар қызметінде өткен брифингте Арман Шәмшин Алмалы ауданында білім беру, денсаулық сақтау мен спорт жүйесі қалай дамып жатқанын баяндады.
Оның айтуынша, бүгінде ауданда 49 мектеп, 60 балабақша мен 25 медициналық ұйым жұмыс істейді. Әлеуметтік инфрақұрылымды жаңарту мен кеңейту жұмысы бірнеше бағыт бойынша жүргізіліп жатыр.
Білім беру саласында биыл бірнеше ірі жоба жүзеге асырыла бастаған.
Атап айтқанда, қыркүйек айына дейін 600 оқушыға арналған №58 мектептің ғимараты қайта жаңғыртылады. Маусым айында №16 мектепке 300 орындық қосымша ғимарат пайдалануға беріледі, сондай-ақ №124 мектеп ғимаратына сейсмикалық күшейту жұмысы мен күрделі жөндеу аяқталады.
№128 мектеп бойынша жобалық-сметалық құжаттама дайындалып жатыр. №134 пен №135 мектепке қатысты сейсмикалық күшейту жұмысынан бас тарту туралы шешім қабылданды: мемлекеттік сараптама қорытындысы бойынша бұл жұмыс тиімсіз деп танылған, қазір құжаттар қайта қаралып жатыр.
Мектепке дейінгі білім беру жүйесінде де жаңарту жұмыстары жоспарланған. Маусым айында №10 балабақшада күрделі жөндеу аяқталып, шілде айында Тастақ шағынауданында жаңа балабақша пайдалануға берілмек.
Қосымша тағы төрт мекемеге — №13, №21, №43 балабақша мен Мәуленов көшесіндегі «Теремок» балабақшасына күрделі жөндеу жүргізу үшін жобалық құжаттама әзірленіп жатыр.
Денсаулық сақтау саласында жыл соңына дейін ауданда екі маңызды нысан ашылады: жаңа перзентхана мен бір ауысымда 500 адам қабылдайтын замандық емхана (Айтеке би мен Масанчи көшесінің қиылысында орналасқан). Арман Шәмшиннің айтуынша, құрылыс жұмысы бекітілген кестеге сәйкес жүргізіліп жатыр.
Сонымен қатар, Абылай хан даңғылының бойында балаларға арналған қалалық оңалту орталығы ашылады. Жоба қазір мемлекеттік сараптамадан өте бастады.
Спорт саласында Тастақ шағынауданында мүмкіндігі шектеулі жандарға арналған көпфункционалды спорт орталығы салынып жатыр. Қазіргі таңда нысанның дайындық деңгейі 40%-ды құрайды, құрылысты қараша айында аяқталады.
Арман Шәмшин атап өткендей, барлық жоба аудан тұрғындары үшін әлеуметтік қызметтердің қолжетімділігі мен сапасын арттыруға бағытталған.