Алматыда «Таза Қазақстан» экологиялық бастамасы аясында Оңтүстік саябақта журналистер мен блогерлер еккен жаңа аллея пайда болды. Іс-шара қаланың экологиясына салғырт қарай алмайтын медиа өкілдерінің басын қосып, жасыл-желекке оранған қала қалыптастыру жолындағы тағы бір маңызды қадамға айналды, – деп хабарлайды aqshamnews.kz тілшісі.
Акцияны осы жолы Алматы қаласының Өңірлік коммуникациялар қызметі Бостандық ауданы әкімдігімен бірлесіп ұйымдастырды.
Бұл күні саябаққа 25 БАҚ өкілі мен блогер жиналып, қаланы көгалдандыруға әркім өзінше үлес қосты.
Акцияға қатысқандар ағаш егіп қана қоймай, саябақтың аумағын тазалап, бейресми жағдайда бір-бірімен пікір алмасты. Іс-шарада БАҚ өкілдері бір-бірімен танысып, бәрі Алматыны көркейте түсуге ниетті екенін байқатты.
Әсіресе Tengrinews ақпарат агенттігінің редакциясы белсенділік танытып, бірден 7 қызметкер акцияға қатысты. Олардың қатарында журналист Ирина Грибовская да болды. Ол мұндай бастамаға жылда қатысады екен. Бұл жолы қызын жетектеп келіп, оған жастайынан табиғатқа қамқор болуды үйретіп жүр.
Экологиялық акцияға урбанист-блогер Тихон Шутов та қосылды. Алматының тумасы қаладағы жасыл-желекті сақтап, қалалық ортаны дамытуға бағытталған кез келген бастаманы қолдайтынын айтып отыр.
Журналистердің алдында Бостандық ауданының әкімі Азамат Қалдыбеков сөз сөйлеп, экология мәселесінде қоғам, медиа мен жергілікті билік күш біріктіргені қалған адамдарды да осы іске ынталандыратынын айтады. Оның пікірінше, мұндай акциядан кейін көпшілік те қоршаған ортаға қамқор бола бастайды.
«Таза Қазақстан» акциясы қоршаған ортаны гүлдендіруге әр адам үлес қоса алатынын тағы дәлелдеді. Өзгерісті әркім өзінен бастауы керек.
Оңтүстік саябақтағы Журналистер аллеясы қаланың көрікін ашып қана қоймай, табиғат пен Алматының болашағына деген ортақ қамқорлықтың символына айналады.