Алматыда жүргізушілер күтпеген жерден айыппұл арқалауы мүмкін. Қалада «STOP бұзушылық» жедел алдын алу іс-шарасы аясында жасырын патрульдеу тәсілі енгізілді, – деп хабарлайды aqshamnews.kz тілшісі.
Енді патрульдік полиция қызметкерлері арнайы белгілері жоқ автокөліктермен, азаматтық киімде жалпы көлік ағыны ішінде жүріп, жолдағы жағдайды бақылайды. Бұл тәсілдің басты мақсаты – жол қозғалысы ережесін өрескел бұзатын жүргізушілерді анықтау.
Әсіресе агрессивті жүргізу деректеріне баса мән берілуде. Олардың қатарында күрт жолақ ауыстыру, «шахмат» тәсілімен жүру, өзге көліктерді қысып өту және жолда апатты жағдай туындату секілді әрекеттер бар.
Мұндай құқық бұзушылықтар тіркелген жағдайда, жасырын патруль қызметкерлері ақпаратты бірден жақын маңдағы полиция экипаждарына жолдайды. Кейін патрульдік полиция көлікті тоқтатып, жүргізушіні заң талаптарына сәйкес жауапкершілікке тартады.
Полицияның мәліметінше, бұл тәсіл қазірдің өзінде нәтижесін бере бастаған. Тек өткен демалыс күндері Алматыда агрессивті жүргізудің 28 фактісі анықталып, жолы кесілген. Барлық құқық бұзушы жауапқа тартылған.
Ведомство өкілдерінің айтуынша, жасырын патрульдеу жүргізушілердің тәртібін бақылауды күшейтіп, жол-көлік оқиғаларының алдын алуға мүмкіндік береді. Әсіресе қауіпті маневрлер мен агрессивті жүргізу салдарынан болатын апаттарды азайту көзделіп отыр.
Алматы қаласы ПД әкімшілік полиция басқармасының бастығы Әбдінұр Тасыбаевтың сөзінше, бұл тәсіл көзге бірден байқала бермейтін өрескел құқық бұзушылықтарды анықтауға көмектеседі. Оның айтуынша, басты мақсат – тек айыппұл салу емес, жолдағы қауіпсіздік мәдениетін қалыптастыру.