Бүгін таңғы сағат 07:00-де Алматы қаласында 653 сайлау учаскесі ашылып, жалпыұлттық референдумға дауыс беру басталды. Алғашқы минуттан-ақ қаланың барлық ауданындағы учаскелерде тұрғындардың белсенді қатысуы байқалды. Көптеген алматылық демалыс күні таңертең ерте келіп, дауыс беруді жөн көрген, – деп хабарлайды aqshamnews.kz тілшісі.
Сайлау учаскелерінде мерекелік көңіл күй қалыптасты. Қала тұрғындары үшін естелік суретке түсуге арналған тақырыптық фотоаймақтар ұйымдастырылып, дәстүр бойынша алғаш дауыс берген азаматтарға шағын сыйлықтар ұсынылды.
Алматыда барлық азаматтың дауыс беруіне қатысуына қолайлы жағдай жасауға ерекше көңіл бөлінген. Көру қабілеті бұзылған азаматтар үшін бюллетеньдерге арналған Брайль қарпімен жазылған арнайы трафареттер дайындалды, ал дауыс беру кабиналары ерекше қажеттілігі бар адамдарға бейімделген. Сонымен қатар учаскелерде цифрлық қолдау ұйымдастырылып, онлайн сурдоаудармашылар есту қабілеті бұзылған азаматтарға қажетті ақпарат алуға көмектеседі.
Мүмкіндігі шектеулі азаматтардың учаскелерге баруын жеңілдету үшін «Инватакси» қызметі де іске қосылды. Бұл қызмет тұрғындардың сайлау учаскелеріне кедергісіз жетуіне мүмкіндік береді. Ал жасы үлкен немесе денсаулығына байланысты учаскеге келе алмайтын азаматтар үшін үйде дауыс беру ұйымдастырылған. Сайлау комиссиясының мүшелері көшпелі жәшіктермен тұрғындардың мекенжайына барып, әрбір азаматтың референдумға қатысуына мүмкіндік жасап отыр.