Орталық Ядролық физика институты маңынан салынады, – деп хабарлайды aqshamnews.kz тілшісі.
Алматыдағы Ядролық физика институтында ядролық реактор мен циклотрон бар, мұнда медицинаға қажетті радиоактивті дәрілік препараттар да өндіріледі. Алдағы уақытта лютеций-177, самарий-153 изотоптары әзірленетін болады.
Онкологтар мен радиологтардың Х съезінде Ядролық физика институтының бас директоры Саябек Сахиев жуырда Ядролық тераностика орталығы құрылатынын мәлімдеді. Ол ЯФИ маңынан салынады.
"Тераностика дегеніміз – терапия және диагностика дегенді білдіреді. Яғни, ауруды анықтау және емдеудің бір мезетте жүргізілуі. Бұл жаңа тәсіл бойынша препараттар әрі ауруды ерте анықтайды, әрі емдейді.
Сонымен қатар, дәрі-дәрмектің науқас адамдарға кері әсерін азайтады.
Шетелдерде қолданылып келе жатқан тераностика әдісі енді елімізде де қолға алынады",- деді ЯФИ басшысы.