Іс-шара Freedom Holding Corp. бас серіктестігімен ұйымдастырылып отыр, – деп хабарлайды aqshamnews.kz тілшісі.
Алматыда 2026 жылы 7-10 сәуір аралығында FIDE мен Халықаралық мектеп шахматы федерациясының (ISCF) қолдауымен өтетін World Schools Team Championship турнирінің Азия құрлығындағы кезеңі басталды.
Жарысқа Азия және ТМД елдерінен 19 мемлекеттен келген 26 мектеп командасы қатысып отыр. 8 бен 14 жас аралығындағы жас шахматшылар бақ сынайды. Турнир жеңімпаздары 2026 жылы желтоқсанда өтетін гранд-финалға жолдама алады.
Салтанатты ашылу рәсіміне Алматы қаласы әкімінің орынбасары Нұрлан Әбдірахым қатысып, турнирдің қалада өтуі Қазақстанның мектеп шахматын дамытудағы жетістігінің айғағы екенін атап өтті. Сондай-ақ шахматты білім беру жүйесіне енгізудің зияткерлік ұлт қалыптастырудағы маңызына тоқталды.
Қазақстан шахмат федерациясының президенті Тимур Турлов соңғы жылдары елде мектеп шахматын жүйелі түрде дамытуға мән беріліп отырғанын айтты. Бүгінде бұл спорт түрімен 60 мыңнан астам бала тұрақты түрде айналысып, қызығушылық артып келеді.
Ашылу рәсімінен кейін алғашқы екі тур басталды. Жалпы турнир 45+10 уақыт бақылауымен швейцар жүйесі бойынша сегіз турдан тұрады.
Сонымен қатар қатысушылар үшін шебердің сабақтары, жаттықтырушылар мен гроссмейстерлермен кездесу, сондай-ақ Қазақстанның ұлттық мәдениетімен танысу бағдарламасы ұйымдастырылған.
Айта кетейік, жарыс Алматы қаласы әкімдігі мен қалалық Спорт басқармасының қолдауымен ұйымдастырылып отыр. Бұл қаланың халықаралық зияткерлік спорт орталығы ретіндегі мәртебесін нығайтуға бағытталған.