Сотты болып, бас бостандығынан айырылған жасөспірімдер жазасын өтеп жатқан №11 мекеме аумағындағы №3 жалпы білім беретін мектепті бітірген биылғы түлектер де аттестат алды.
Салтанатты жиын еліміздің Әнұранымен басталды. Ортаға 9 және 11- сыныпты бітіруші түлектер сынып жетекшілерімен шықты. №11 мекеменің тәрбие бөлімінің бастығы, әділет подполковнигі Алма Бәзілбаева жазалы жасөспірімдерді мерекемен құттықтап, болашақта жақсы азамат болып шығатындықтарына сенім білдірді.
Мектептің оқу және тәрбие жөніндегі орынбасарлары Людмила Васильевна мен Айзада Әбдімәдиқызы да жылы лебіздерін жеткізіп, 11-сыныпты бітірген 17 оқушыға, 9-сынып бітрген 4 оқушыға аттестат табыстады.
Жалпы, 21 жасөспірім жалпы және негізгі орта білім туралы аттестат алып, қуанышқа бөленді. 11-сыныпты бітірген 5 екпінді оқушы «Мақтау қағазымен» және қоғамдық жұмыстарға белсене қатысқан оқушылар «Алғыс хатпен» марапатталды. Іс-шара концерттік бағдарламамен жалғасты.
Бұл сәт те есте қалсын деген ниетпен, мектеп бітірушілер тілектер жазылған түрлі-түсті шарларды көкке ұшырды. Балалардың өздері темір торлы қоршауда жүрсе де, олардың асқақ арманы жазылған шарлар еш кедергісіз аспан әлеміне жол тартты.