Алматыда тұтынушылардың құқықтық сауаттылығын арттыруға бағытталған әлеуметтік жоба өз мәресіне жетті.
Алматы қаласы Қоғамдық даму басқармасының қолдауымен және "AMANAT" партиясы жанындағы "Жастар Рухы" жастар қанатының ұйымдастыруымен 2025 жылдың сәуір-қазан айлары аралығында жүзеге асқан "Тұтынушылардың құқығын қорғау" жобасы табысты аяқталды.
Жоба аясында қала жастары мен тұрғындарының тұтынушылық мәдениетін қалыптастыру, заңдық білімін арттыру бағытында бірқатар кешенді іс-шаралар ұйымдастырылды.
12 жоғары оқу орнында 1000-ға жуық студенттің қатысуымен ақпараттық дәрістер өтті. Лектор-заңгерлер тұтынушылардың құқықтарын қорғау тетіктері мен заң нормаларын түсіндіріп, нақты мысалдар арқылы кеңес берді.
Сонымен қатар, 50-ден астам сауда орталықтары, базарлар және қоғамдық орындарда кең ауқымды түсіндіру акциялары ұйымдастырылып, 2000-ға жуық алматылық қамтылды. Азаматтарға сапалы қызмет пен әділ сауданы талап ету жолдары түсіндірілді.
Жоба шеңберінде арнайы жедел желі жұмыс істеп, тұтынушылардан келіп түскен 150-ге жуық сауалға заңгерлік кеңес берілді. Бұған қоса, арнайы әлеуметтік бейнеролик әзірленіп, ол халыққа қызмет көрсету орталықтарында және оқу орындарында көрсетілді.
"Тұтынушылардың құқықтық сауаттылығын арттыру – әділ нарық пен сапалы қызметтің басты кепілі. Бұл бағыттағы жұмыс алдағы уақытта да жалғасын табады", – дейді жоба ұйымдастырушылары.
Қазанның аяғында жобаның қорытындысына арналған дөңгелек үстел өткізіліп, атқарылған жұмыстар мен ұсыныстар бойынша есептік ақпарат ұсынылмақ.
