Алматы қаласы ҰҚК департаментінің Терроризмге қарсы орталығы бөлімінің ұйымдастыруымен журналистер пулының қатысуымен қорытынды кездесу өтті, – деп хабарлайды aqshamnews.kz тілшісі.
Іс-шара барысында қаладағы бұқаралық ақпарат құралдарында радикалды экстремизмнің алдын алу және терроризмге қарсы іс-қимыл мәселелерін кәсіби әрі жауапкершілікпен жариялаудың маңызы кеңінен сөз болды. Мамандар ақпарат тарату кезінде ресми дереккөздерге сүйенудің және қоғамға нақты, тексерілген мәлімет ұсынудың рөліне ерекше тоқталды.
Жиында Алматы қаласында терроризмге қарсы комиссияның атқарған жұмыстары мен өткізілген профилактикалық іс-шаралары туралы жан-жақты ақпарат берілді. Сонымен қатар еліміздің өзге өңірлеріндегі журналистер дайындаған материалдарға шолу жасалып, оң тәжірибелерді қолдану тетіктері талқыланды.
Кездесу барысында журналистер өзекті сауалдарын қойып, ақпараттық өзара іс-қимылды жетілдіру жолдары жөнінде пікір алмасты. Нәтижесінде БАҚ өкілдері алдағы уақытта терроризмге қарсы бағыттағы профилактикалық іс-шараларды кеңінен насихаттауға белсенді атсалысуға дайын екендерін білдірді.
Ұйымдастырушылардың айтуынша, мұндай кездесулер ақпараттық қауіпсіздікті күшейтуге, сондай-ақ экстремизм мен терроризмнің алдын алу бағытындағы тиімді ынтымақтастықты дамытуға ықпал етеді.