Алматы қаласының Жастар саясаты басқармасы мен «Ұлыс» ғылыми-зерттеу орталығы бірлесіп, «Тәуелсіздік ұрпақтары» грантын тағайындау бойынша конкурстың басталғанын хабарлады.
Бағдарлама жастар бастамаларын қолдауға бағытталып, 14 пен 35 жас аралығындағы Алматы тұрғындарына өз жобаларын іске асыру үшін 1 000 000 теңге көлемінде грант алу мүмкіндігін ұсынады.
Гранттар алты бағыт бойынша беріледі:
- Ғылым: жас ғалымдарды және олардың зерттеулерін қолдау.
- Мәдениет: мәдени мұраны сақтауға және насихаттауға арналған жобалар.
- Ақпараттық технологиялар: цифрлық трансформацияға бағытталған жаңа IT шешімдерін әзірлеу.
- Бизнес: стартаптар мен бизнес-бастамаларды қолдау.
- Медиа: жас ұрпақ үшін сапалы контент жасау.
- Волонтерлік: әлеуметтік мәселелерді шешуге бағытталған бастамалар.
Ұйымдастырушылардың айтуынша, бұл грант жастарға өз идеяларын жүзеге асыруға және қала мен елдің дамуына үлес қосуға бірегей мүмкіндік береді.
«Жастарымыздан шығармашылық идеялар күтеміз және баршаңызды гранттық конкурсқа қатысуға шақырамыз. Қатысушыларға шабыт пен табыс тілейміз», - деді Жастар саясаты басқармасының Жастарды әлеуметтендіру және бастамаларды қолдау бөлімінің басшысы Нұрсұлтан Беккайыров.
Өтінімдер 16 қыркүйектен бастап 2024 жылдың 16 қазанына дейін қабылданады. Жеңімпаздар 15 жұмыс күні ішінде анықталады.
Өтінімдер generationala.kz сайты арқылы қабылданады. Қосымша сұрақтар бойынша +7 (776) 844-12-02, +7 (776) 829-78-41 нөмірлеріне хабарласуға болады.