Алматы қаласында Жастар саясаты басқармасының қолдауымен студент жастарға арналған «Jas Gala» қалалық фестивалі ұйымдастырылады, – деп хабарлайды aqshamnews.kz тілшісі.
Алматы қаласы Жастар саясаты басқармасының қолдауымен және «Алматы студенттер Альянсы» корпоративтік қорының ұйымдастыруымен қалалық студенттік көктем — «Jas Gala» фестивалі өтеді.
Фестивальдің негізгі мақсаты — университеттік дәстүрлерді нығайту, студенттерді шығармашылық арқылы біріктіру және дарынды жастарды қолдау. Сондай-ақ жоба аясында шығармашыл, талантты жастарды анықтап, олардың кәсіби дамуына жол ашу, адамгершілік құндылықтарды, эстетикалық және интеллектуалдық талғамды дамыту көзделген.
Байқау бес бағыт бойынша өтеді. Олар: вокал, хореография, мобилография, аспаптық орындау және театр.
Фестивальге Алматы қаласындағы жоғары оқу орындарының студенттері қатысады. Іс-шара аясында қатысушылар үшін шеберлік сабақтары мен мотивациялық кездесулер де ұйымдастырылады.
Байқау қорытындысы бойынша жеңімпаздарды салтанатты марапаттау рәсімі өтіп, концерттік бағдарлама ұсынылады.
Фестивальдің жалпы жүлде қоры - 7 500 000 теңге.
Ал әр бағыт бойынша өнер майталмандары, мәдениет саласының өкілдері, өнер жұлдыздары мен қоғам қайраткерлері қазылық етеді.