Алматы қаласының Цифрландыру басқармасы мәслихаттың қарауына «Алматы қаласының жол қозғалысын талдау және қауіпсіздікті қамтамасыз етудің зияткерлік жүйесі» («Сергек» МЖК) жобасы бойынша мемлекеттік-жекешелік әріптестік шартын ұзарту туралы шешім жобасын енгізді, - деп хабарлайды Aqshamnews.kz.
Бұл туралы депутаттар алдында баяндама жасаған Алматы қаласы цифрландыру басқармасы басшысының міндетін атқарушы Мейрам Дюсюков мәлімдеді.
Негізгі тезистер:
▪️ «Сергек» МЖК жобасы 2021 жылдан бері іске асырылып келеді.
Шарт Алматы қаласының Цифрландыру басқармасы, Полиция департаменті және «Көркем Телеком» ЖШС арасында жасалған.
▪️ Бастапқыда 766 аппараттық-бағдарламалық кешен орнату көзделген.
Мемлекеттік міндеттемелер көлемі – 9,9 млрд теңге.
▪️ 2021 жылдан бері 4 рет қосымша келісім жасалып, кешендер саны 1641 АПК-ға дейін ұлғайтылды.
▪️ Қолданыстағы шарттың мерзімі 2025 жылғы 31 желтоқсанда аяқталады.
Осыған байланысты қала әкімінің тапсырмасымен жұмыс тобы құрылды.
▪️ Жұмыс тобы 4 әлеуетті жеткізушінің баламалы ұсыныстарын қарады, соның ішінде:
– «Сункар»,
– «Мерген»,
– Presight AI Kazakhstan,
– «Азимут» жүйелері,
сондай-ақ қолданыстағы серіктес – «Көркем Телеком» ұсынысы.
▪️ Екі айлық талдау нәтижесінде, конкурс өткізуге уақыттың болмауына байланысты, шартты бір жылға ұзарту ұсынылды.
Ұсынылып отырған өзгерістер:
- Шарт мерзімін бір рет қана 2026 жылғы 31 желтоқсанға дейін ұзарту;
- Жеке серіктес есебінен қосымша 350 «Сергек» кешенін орнату;
- Қызмет көрсету тарифі 2021 жылғы деңгейде сақталады, өсім болмайды.
Аталған өзгерістер «Мемлекеттік-жекешелік әріптестік туралы» заң талаптарына толық сәйкес келеді және жеке серіктестің қосымша инвестиция салуын көздейді.
Осыған байланысты Алматы қаласы мәслихатының 2021 жылғы 30 сәуірдегі №35 шешіміне өзгеріс енгізу туралы шешім жобасы қарауға ұсынылды.