Алматыда Сайран су қоймасына қалқыма көпір салынды. Абаттандыру жұмыстары әлі де жалғасып жатыр, - деп хабарлайды aqshamnews.kz тілшісі 24kz-ке сілтеме жасап.
Қалқыма көпірдің ұзындығы 251 метр. Сайранның екі жағасын байланыстырып тұр. Оның ерекшелігі сол, әр қадам басқан сайын, судың сылдырын сезініп, көл бетімен кетіп бара жатқандай сезім сыйлайды. Көпір резеңкеден жасалған модульдік блоктардан салынып, жиналмалы 33 зәкірмен бекітілген. Құрылымы өте берік. Бір шаршы метрінің өзі 400 келіге дейін салмақты еркін көтереді.
"Қауіпсіздік туралы айтатын болсақ, ол жағына алаңдауға негіз жоқ. Біз оны әбден сынақтан өткізіп көрдік. Адам түгілі жүк тиелген ауыр көлік жүріп өтсе де, көтере береді. Мәскеуде осы көпірдің құрылымын сатып алған кезде сол жерде де тексердік. Барлық қауіпсіздік талабына сай келеді. Одан қиыс кеткен жеріміз жоқ", - дейді жоба жетекшісі Ринат Зілмұхамедов.
Сайран су қоймасы 1971 жылы салынған. Содан бері бірнеше рет жөндеу жүргізілгенімен дәл осылай адам арнайы іздеп келетін көрікті орынға айналмаған. Бұл жолы оның жан-жағы адам танымастай өзгерді. Қала ортасынан оазис пайда болды. Қазір жақын маңда тұратын үлкен-кіші осы жерден табылады.
Сайранды абаттандыру жұмыстары әлі толығымен аяқталған жоқ. Қазір бұл жерде 200-ге жуық жұмысшы еңбек етіп жатыр.
"Қыркүйекке дейін жұмысты аяқтауды жоспарлап отырмыз. Демалыс аймағының негізгі бөлігін абаттандыруға барынша ден қойдық. Оған қоса, автоматты өрт сөндіру жүйесін қайта құрып, баспалдақпен жүретін алаңның көпшілікке ыңғайлы , қауіпсіз болуын назарға алдық. Мұның барлығы, әрине, ең алдымен келушілердің жайлы жұүріп, еркін серуендеуі үшін жасалып жатыр", - дейді қалалық қоғамдық кеңістікті дамыту басқармасының бөлім басшысының міндетін атқарушы Оңалбек Қыдырбаев.
Сайранның жағалауы екінші арбатқа айналуы мүмкін. Отбасылық серуен құрып, ұмытылмас кеш ұйымдастырып, қаланың әсем көрінісін тамашалауға болады. Мұнда қазірден серуендеуге келген кісі қарасы қалың. Музыкалық аспабын асынып, жанды дауыспен ән шырқаған өнерпаздар да баршылық. Ал суға түсуге тыйым салынған.