Алматыда Саин көшесінде қоғамдық көлікке арналған арнайы жолақты ұйымдастыру бойынша пилоттық жоба аяқталды, – деп хабарлайды aqshamnews.kz тілшісі.
Жоба қорытындысы қоғамдық көлікке басымдық берудің тиімді екенін көрсетті. Сондай-ақ арнайы жолақтарды алдағы уақытта бірыңғай кешенді схема аясында дамыту форматы айқындалды. Бұл туралы қалалық Жол қозғалысын ұйымдастыру және жолаушылар көлігі басқармасының өкілдері хабарлады.
Саин көшесіндегі арнайы жолақ қаладағы көлік қозғалысы ең қарқынды магистральдардың бірінде қоғамдық көлікке басымдық берудің тиімділігін бағалау мақсатында пилоттық режимде енгізілген болатын.
Мониторинг нәтижесі арнайы жолақ енгізілгеннен кейін қоғамдық көлік жұмысының негізгі көрсеткіштерінде оң өзгеріс болғанын көрсетті.
Әсіресе, қарбалас уақытта айқын нәтиже тіркелді. Таңғы қарбалас уақытта қоғамдық көліктің жол учаскелеріндегі қозғалыс жылдамдығы 26,2 км/сағ-тан 31,8 км/сағ-қа дейін, яғни 21,37%-ға артты. Кешкі қарбалас уақытта орташа жылдамдық 25 км/сағ-тан 30,4 км/сағ-қа дейін өсіп, 21,6%-ға артты.
Сонымен қатар қоғамдық көлік қозғалысының тұрақтылығы жақсарды. Бір күн ішіндегі орташа қозғалыс аралығы 13,6 минуттан 12 минутқа дейін, яғни шамамен 12%-ға қысқарды. Ал таңғы қарбалас уақытта аралық 13,6 минуттан 11,6 минутқа дейін немесе 14,7%-ға азайды.
Жолаушылар санында да оң динамика байқалды. Бір тәуліктегі жолаушылар саны 42 396-дан 44 515,8-ге дейін, яғни 5%-ға артты.
Қозғалыс жылдамдығы мен тұрақтылығының жақсаруымен қатар жолаушылар санының артуы аталған бағытта қоғамдық көлікке деген сұраныстың өскенін көрсетеді.
Осылайша, пилоттық жобаның нәтижесі арнайы жолақтардың қоғамдық көліктің қозғалыс жылдамдығы мен тұрақтылығын, әсіресе қарбалас уақытта арттырудың тиімді құралы екенін растады.
Сонымен бірге пилоттық жоба арнайы жолақтарды жеке-жеке учаске ретінде емес, қаланың негізгі магистральдарында қоғамдық көлікке басымдық беретін өзара байланысты біртұтас жүйе ретінде дамыту қажеттігін көрсетті.
Осыған байланысты Саин көшесі әл-Фараби даңғылы – Саин көшесі – Рысқұлов даңғылы – Шығыс айналма жолы бағыттарын қамтитын айналма маршруттың кешенді схемасының бір бөлігі ретінде қарастырылып отыр. Бұл бағытта қоғамдық көлікке басымдық беріледі.
2026 жылы 31 тамыздан бастап Саин көшесіндегі арнайы жолақ алынып тасталады. Бұл пилоттық форматтан келесі кезеңге, яғни жол желісінің басқа учаскелерін және кешенді схеманы іске асыруға қажетті нормативтік талаптарды дайындауға көшуге байланысты.
Ол үшін жол желісінің басқа учаскелерін кезең-кезеңімен дайындау, сондай-ақ Қазақстан Республикасының жол қозғалысын ұйымдастыру саласындағы қолданыстағы стандарттары мен нормативтік құжаттарына қажетті өзгерістер енгізу қажет.
Қажетті нормативтік шешімдер қабылданып, тиісті инфрақұрылым дайындалғаннан кейін Саин көшесіндегі қоғамдық көлікке басымдық беретін қозғалысты қаланың негізгі магистральдарындағы арнайы жолақтардың өзара байланысты жұмысын қамтамасыз ететін кешенді схема аясында жүзеге асыру жоспарланып отыр.
Алматы әкімдігі қоғамдық көлікті дамытуды және қала жолдарында оның басым қозғалысына жағдай жасауды жалғастырады.