Бүгін Қазақстанда атом электр станциясын салу бойынша республикалық референдум басталды. Таңертеңнен бері алматылықтар белсенді түрде дауыс беріп жатыр, кейбір сайлау учаскелерінде ұзын-сонар кезектер байқалуда.
Бұл азаматтардың қоғамдық мәселелерге деген қызығушылығы мен белсенділігінің жоғары екенін көрсетеді.
Алматының Наурызбай ауданындағы сайлау учаскелеріне келген қарт кісілер тарихи сәтте тек дауыс беріп қана қоймай, жастарға бата беріп, ел болашағына деген үміттерін білдірді. Олар әрбір азаматтың таңдауы елдің дамуына қосқан маңызды үлес екенін атап өтті.
«Бүгін біз маңызды мәселе бойынша өз пікірімізді білдіріп, жастарымыздың жарқын болашағына үміттенеміз», – деді дауыс берушілердің бірі.
Референдумға танымал қоғамдық қайраткерлер, спортшылар, және артистер де қатысып жатыр. Алматы әкімі Ерболат Досаев жұбайымен бірге №48 мектеп-лицейіндегі №388 сайлау учаскесіне барып, алғашқы дауыс берушілердің бірі болды.
Алматы қаласында 624 сайлау учаскесі жұмыс істеп тұр. Қала тұрғындары тұрғылықты мекенжайы бойынша сайлау учаскелеріне барып, сағат 20.00-ге дейін дауыс бере алады.