Республика сарайында еліміздің басты ұлттық мерекесі – Республика күніне арналған мерекелік концерт өтті. Іс-шараға Алматы әкімі Ерболат Досаев, Қоғамдық кеңес мүшелері, мәслихат депутаттары, зиялы қауым өкілдері, денсаулық сақтау, білім беру, мәдениет саласының қызметкерлері және бүгін мемлекеттік наградалармен марапатталған азаматтар қатысты, деп хабарлайды aqshamnews.kz
Концерттің ресми бөлімі Қазақстан Республикасының Мемлекеттік туын сахнаға алып шығып, елдің еңбек сіңірген қайраткері Талғат Күзембаевтың Мемлекеттік әнұранды орындауымен басталды.
Бағдарламада SteppeSons тобы, Карина Абдуллина, ARO және Жұбаныш Жексенұлы, Жанар Доғалова, ALPHA тобы және басқа да танымал артистер патриоттық әндер орындады. Белгілі домбырашы-күйші Асылбек Еңсеповтың «Махаббат өзені» шығармасы бұл жолы екі скрипка дуэтінің сүйемелдеуімен орындалды.
Сонымен қатар, Байғали Серкебаев жас орындаушы Kyle Ruh-пен бірге жарық шоу аясында A’Studio тобының әндерінен попурри айтты. Жастардың кумирі Садраддин «Мелодрама» әнін шырқаса, аты аңызға айналған «Дос-Мұқасан» тобы «Алматы түні» және «Қайдасың?» атты танымал хиттерін орындады. Сондай-ақ, сахнада «Wake up» балетінің шығармашылық және би қойылымдары көрсетіліп, Отанға деген махаббатты бейнеледі.
Концерт Қазақстанның халық артисі Роза Рымбаева мен елдің еңбек сіңірген қайраткері Біржан Хасанғалиевтің хордың сүйемелдеуімен орындаған «Атамекен» әнімен аяқталып, концерттің барлық қатысушысы сахнаға шықты.