Алматыда Республика күніне арналған ауқымды «Жанашыр жүрек» акциясы басталды. Іс-шара қалалық еріктілер фронт-кеңсесінің бастамасымен және Жастар саясаты басқармасының қолдауымен өткізіліп жатыр.
16-25 қазан аралығында акция аясында 20-дан астам түрлі іс-шара ұйымдастырылуда. Солардың қатарында «Qamqor bol» үйсіз жандарға ыстық шай мен тағам тарату, қарттар үйінде шығармашылық кеш өткізу, ашық аспан астындағы J-FEST концерті, жастар пікірсайыс турнирі және әлеуметтік нысандарды тазалау мен абаттандыруға арналған «Әлеуметтік шеберхана» акциясы бар. Сонымен қатар Republic Day атты онлайн челлендж іске қосылып, белсенді жастар мен блогерлер игі ісін айтып, қала тұрғындарын мерекемен құттықтап жатыр.
«Алматылық еріктілер ізгіліктің – уақытша науқан емес, өмір салты екенін көрсетіп келеді. «Жанашыр жүрек» – балалар үйлеріне, қарттар үйіне көмек көрсететін, экологиялық және әлеуметтік жобалар ұйымдастыратын, аз қамтылған отбасыларға қолдау білдіретін жастарды біріктіретін дәстүрге айналды. Біз Алматыдан бастау алған мейірім толқынының өзге өңірлерге де шабыт беріп жатқанына қуаныштымыз», – деді қалалық Жастар саясаты басқармасының басшысы Азиз Кажденбек.
Алдағы күндері «Жанашыр жүрек» акциясы аясында экологиялық сенбілік Eco Day, Қан орталығымен бірлесе өтетін қан тапсыру акциясы, сондай-ақ еліміздің танымал тұлғалары туралы бейнероликтер топтамасын қамтитын «Elge qyzmet» жобасы жүзеге аспақ. Бұған қоса, балалар үйі тәрбиеленушілері арасында спартакиада және патриоттық бағыттағы зияткерлік ойын Almaly Night ұйымдастырылады. Барлық іс-шара алматылық жастардың азаматтық белсенділігін арттыруға, мейірімділік мәдениеті мен әлеуметтік жауапкершілікті қалыптастыруға бағытталған.
«Республика күніне арналған «Жанашыр жүрек» акциясы жастардың қоғамдық белсенділігін арттыруға және еріктілік мәдениетін дамытуға бағытталған кешенді бастамалардың бірі. Республика күні – тәуелсіз еліміздің берік іргетасын қалаған ұлық мереке. Айтулы мерекеге орай қолға алынған игі істер жастардың патриоттық рухын күшейтіп, ел дамуына үлес қосуға ынталандырады. Біз алматылық еріктілердің белсенділігін, қоғам игілігі үшін жасап жатқан нақты істерін жоғары бағалаймыз», – деді «QAMQOR CHARITY» қоғамдық қорының төрайымы Бағдат Анарбаева.
