Алматыда қалалық реновация бағдарламасы аясында тұрғын үй қорын жаңарту жұмыстары жалғасуда, – деп хабарлайды aqshamnews.kz тілшісі. Бұл туралы қала әкімі Дархан Сатыбалды мәлімдеді.
Қазіргі таңда мегаполисте 35 реновация жобасы іске асырылып жатыр. Жыл басынан бері тозығы жеткен үйлердің 432 меншік иесі жаңа баспанаға қоныстанса, жыл соңына дейін тағы 1165 тұрғынды көшіру жоспарланған. Бағдарламаға қатысушыларға «бөлмеге бөлме» қағидаты бойынша жаңа пәтер немесе ақшалай өтемақы ұсынылады.
Қала әкімі бағдарламаның жүзеге асу қарқыны күткендей емес екенін атап өтіп, оған тұрғын үйлерді сатып алу рәсімдері мен заңнамалық өзгерістер әсер еткенін айтты.
Осыған байланысты Дархан Сатыбалды әрбір нысан бойынша қосымша талдау жүргізуді, белгіленген мерзімді сақтамайтын немесе құрылыс сапасына қойылатын талаптарды орындамайтын мердігерлермен жасалған келісімшарттарды бұзу мәселесін қарастыруды тапсырды.
Сонымен қатар қаладағы нүктелік құрылыстың алдын алу мақсатында реновация жобалары кварталдық қағидат бойынша кешенді түрде жүзеге асырылатыны айтылды. Бұл тәсіл бірыңғай сәулеттік келбетті сақтап, көршілес кварталдардың үйлесімді дамуына мүмкіндік береді.