Алматы онкологиялық орталығында қуықасты безі обырының алдын алу және оны ерте анықтауға арналған Ашық есік күні ұйымдастырылды, – деп хабарлайды aqshamnews.kz тілшісі.
Бұл туралы Алматы қаласы Қоғамдық денсаулық сақтау басқармасының өкілдері хабарлады.
Іс-шара барысында 64 ер адам онколог-дәрігерлерден тегін кеңес алды. Көрсетілім болған жағдайда пациенттер ультрадыбыстық (УДЗ) тексеруден де өтті.
Тексеру қорытындысы бойынша қуықасты безі обыры немесе қатерлі ісікке күдік келтіретін жағдайлар анықталған жоқ. Дегенмен, бірқатар пациенттен әрі қарай бақылау мен емдеуді қажет ететін аурулар табылды.
Акция аясында мамандар қуықасты безі мен қуыққа 50-ден астам ультрадыбыстық зерттеу жүргізді.
Дәрігерлердің айтуынша, қуықасты безінің көптеген ауруы бастапқы кезеңде ешқандай белгі бермейді. Сондықтан профилактикалық тексеруден тұрақты өтіп тұру ауруды ерте анықтауға және дер кезінде қажетті емді бастауға мүмкіндік береді.