Алматыдағы сауда орталықтарының бірінде тұрғындар мен жастардың құқықтық сауаттылығын арттыруға және Конституцияның жаңа жобасын түсіндіруге бағытталған «Құқық + AI: құқығыңды біл» атты интерактивті экспромт-кездесу өтті, – деп хабарлайды aqshamnews.kz тілшісі.
Іс-шара барысында қала тұрғындары мен жастар жасанды интеллект технологияларының көмегімен конституциялық өзгерістердің негізгі ережелерімен танысуға мүмкіндік алды. Қатысушылар интерактивті алаңға келіп, өздерін толғандырған сұрақтарын қойып, түсінікті әрі қолжетімді форматта жедел жауаптар алды.
Кездесудің ашық әрі заманауи форматы келушілердің үлкен қызығушылығын тудырды. Қатысушылар ақпараттың ұсынылу тәсілінің ыңғайлылығын және мұндай құқықтық ағарту форматының практикалық пайдасын ерекше атап өтті.
«Бұл формат өте ыңғайлы болды. Жасанды интеллект технологияларының көмегімен маңызды сұрақтарға жылдам жауап алып, Конституциядағы өзгерістерді тереңірек түсіндік. Осындай бастамалар жастардың қоғамдық-саяси өмірге саналы қатысуына ықпал етеді.», - деді жас белсенді Бейбіт Жасұланұлы.
Аталған шара Алматы жастары мен қала тұрғындарының құқықтық мәдениетін арттыруға және азаматтық жауапкершілігін нығайтуға бағытталған бастамалардың бірі болды.