Алматыда және жалпы Қазақстанда орман алқаптарын өрттен қорғау бойынша белсенді жұмыс жалғасуда. «Қазавиаорманқорғау» РМҚК деректеріне сәйкес, 2024 жылы соңғы 10 жылдағы орман өрті қаупінің ең төменгі деңгейі тіркелді. Бұл қолайлы ауа райы жағдайлары мен авиациялық қызметтің тиімді жұмысының нәтижесінен мүмкін болды. Бұл туралы өңірлік коммуникациялар қызметінің баспасөз конференциясында мекеменің бас директоры Марлен Айнабеков мәлімдеді, деп хабарлайды aqshamnews.kz
«Біздің басты міндетіміз – өртті уақтылы анықтау және оны тез арада жою. 2024 жылы біз 218 өрттің 120-сын анықтадық. Авиациялық және жерүсті қызметтерінің үйлесімді жұмысының арқасында қысқа мерзімде өрттің 93%-ы жедел сөндірілді», – деп атап өтті бас директор.
Оның айтуынша, қызметті жаңғырту аясында ескі техникалар толықтай жаңартылды. Өрт сөндіру жүйелерімен жабдықталған заманауи ЕС-145, АН-125, H-130 тікұшақтары пайдалануға берілді.
Бұдан бөлек, 2025 жылы бөлімшелерге өртті тиімді сөндіруге мүмкіндік беретін инновациялық SFP (Stop Fire Plus – Concentrate) өртке қарсы қоспасы жеткізілмек.
Спикер сондай-ақ халықаралық ынтымақтастықтың маңыздылығын ерекше атап өтті. Қазақстан Азия орман секторындағы ынтымақтастық ұйымы (AFoCO) бағдарламасына белсенді қатысып, Франция, Канада, Оңтүстік Корея және Таиландтың жетекші мамандарынан кәсіби дайындықтан өтуде