Бастапқы және танымал блогерлер интернеттегі қазақ тіліндегі контентті қалай жасау және ілгерілету жайын талқылады, деп хабарлайды aqshamnews.kz
Форумды Алматы қаласы Қоғамдық даму басқармасына қарасты қоғамдық даму орталығы ұйымдастырды. Бір алаңда шығармашылық қауым мен медиаиндустрия мамандары бас қосты. Сарапшылар қазақ тіліндегі қызықты әрі сапалы контенттің танымал интернет алаңдарында жетіспеуі мәселесін көтерді.
– Бүгінде мемлекеттік тілде жазылған посттар мен видеороликтер әлеуметтік желілерде жиі шыға бастады, расында да жақсы контент бар, бірақ әлі де аз. Көптеген тақырыптар бос тұр. Бұны өзгерту үшін тек айту емес, нақты әрекет қажет. Сондықтан біз QAZAQVISION форумын ұйымдастыруды ұйғардық. Бұл форум қазақ тілінде сапалы контент жасағысы келетіндерді және сала мамандарын біріктірді, – деді шара ұйымдастырушысы Дамир Ыскақ.
Форум алдында Instagram желісінде қазақтілді контентке арналған бейнероликтер байқауы өткізілді. Ұйымдастырушылар ыңғайлы болу үшін нақты тақырып – ұлттық салт-дәстүрлерді белгіледі. Байқауға 96 жұмыс келіп түсті. Арнайы комиссия олардың ішінен үздік алты видеоны іріктеп, авторларға ақшалай сыйлықтар табыстады. Жалпы жүлде қоры екі миллион теңгеге жуық болды.
– Болашақта бұл байқауға қатысушылар санын көбейтуді, оны тек Instagram-да емес, TikTok-та да өткізуді жоспарлап отырмыз. Біз бұл байқаудың тұрақты жобаға айналғанын қалаймыз, – деді Дамир Ыскақ.
Байқау жеңімпаздарының бірі – сырға салу дәстүріне арналған видеоролик түсірген блогер Ақжарқын Керімбекова болды.
– Бұл – кішкентай кезден әрбір қыз бала армандайтын, өте әдемі қазақтың дәстүрі. Бейнежазбада менің сегіз жастағы сіңілім түсті. Ол қуана келісті. Мен блог жүргізіп жүргеніме екі жыл болды. Контентім негізінен бьюти индустрия тақырыбына арналады. Қыздарымыз әрдайым әдемі жүрсе екен деймін. Әлеуметтік тақырыптағы роликтерім де бар. Қазір 38 мың жазылушым бар, болашақта көбейеді деп үміттенемін. Осындай байқаулар өте үлкен мотивация береді, – дейді Ақжарқын.