Алматы қаласы әкімдігінде «Қалдықтарды кәдеге жарату негізінде электр энергиясын өндіру» жобасы бойынша инвестициялық келісімге қол қойылды. Құжатқа Қазақстан Республикасының Экология және табиғи ресурстар министрі Ерлан Нысанбаев пен қытайлық инвестор – «Junxin Environmental Protection (Almaty)» ЖШС қол қойды, деп хабарлайды Аqshamnews.kz.
Алматы әкімі Дархан Сатыбалды жоба стратегиялық тұрғыдан аса маңызды екенін атап өтті. Оның айтуынша, еліміздің ең ірі мегаполисі үшін бұл тек жаңа инвестициялық жоба ғана емес, заманауи халықаралық стандарттарға сәйкес қалдықтарды басқарудың жаңа жүйесін қалыптастыру жолындағы маңызды қадам болып табылады.
Әкімнің айтуынша, Алматыда жыл сайын шамамен 1 миллион тонна қатты тұрмыстық қалдық түзіледі. Сондықтан дәл осы қалада мұндай ауқымды бастамаларды іске асырудың маңызы зор.
«Жаңа инновациялық зауыт қоқысты полигондарға көму көлемін айтарлықтай қысқартып, экологиялық жағдайды жақсартуға мүмкіндік береді. Бұл жоба жасыл экономиканы дамытуға елеулі үлес қосып, қазіргі және келер ұрпақтың игілігіне қызмет етеді деп сенеміз», — деді Дархан Сатыбалды.
Болашақ зауыт Қазақстанда қалдықтарды энергетикалық кәдеге жаратуға арналған алғашқы кәсіпорын болады. Ол зиянды шығарындыларды барлығын толықтай ұстап, Еуропалық одақтың экологиялық қауіпсіздік стандарттарына сай жұмыс істейді. Кәсіпорынның қуаттылығы тәулігіне 1600–2000 тонна қалдықты өңдеуге есептелген. Соның нәтижесінде 60 МВт электр энергиясы өндіріледі. Жобаның жалпы инвестиция көлемі 280 миллион АҚШ долларын құрайды. Зауыт заманауи автоматтандырылған басқару жүйелерімен және көпсатылы тазарту кешенімен жабдықталады. Бұл қоршаған ортаға түсетін ықпалды барынша азайтып, экологиялық қауіпсіздікті қамтамасыз етеді.
Жоба аясында қатты тұрмыстық қалдықтармен қатар, медициналық және қалалық қалдықтарды, сондай-ақ кәріздік тазарту құрылыстарынан шыққан тұнбаларды кешенді қайта өңдеу қарастырылған. Оның базасында электр және жылу энергиясын өндіру, жаңартылатын энергия көздерінде деректерді өңдеу, кадр даярлау және халықтың экологиялық сауаттылығын арттыру орталығын құру бағыттарын дамытады. Құрылыс кезеңінде шамамен 700 уақытша жұмыс орны ашылады. Ал нысан пайдалануға берілгеннен кейін 120-дан астам тұрақты жұмыс орны құрылады.
Қалдықтарды энергетикалық кәдеге жарату – Қазақстан Республикасының Экологиялық кодексінде айқындалған негізгі бағыттардың бірі. Алматыда осы жобаны жүзеге асыру пилоттық бастамаға айналып, еліміздің өзге өңірлерінде де осындай өндірістерді дамытуға үлгі болмақ.
Анықтама үшін:
«Hunan Junxin Environmental Protection» – 2011 жылы құрылған жекеменшік қытай компаниясы. Ол қатты тұрмыстық қалдықтарды басқару саласында экологиялық тұрғыдан қауіпсіз шешімдерге маманданған. Компания қызметіне қалдықтарды термиялық қайта өңдеу, электр энергиясын өндіру және ресурстарды қайта пайдалану бағыттары кіреді. Компания озық технологияларды және заманауи басқару тәсілдерін белсенді енгізіп, операциялық тиімділікті арттыруға әрі қоршаған ортаға ықпалды барынша азайтуға ұмтылады.
2024 жылы Қытайда 3,2 млн тонна тұрмыстық қалдықты қайта өңдеп, 1,473 млрд кВт⋅сағ электр энергиясын өндірді. Компанияның 400-ден астам патенті бар, оның ішінде шлак, сүзгіден өткен сулар мен тамақ өнеркәсібінің қалдықтарын кәдеге жарату саласындағы патенттер де қамтылған. 2024 жылдан бастап компания халықаралық ауқымын кеңейтіп, басты назарды Орталық Азия елдеріне аударып отыр. Қазіргі уақытта Қырғызстанда үш жоба іске асырылу кезеңінде.