Алматыда ҚР Мәдениет және ақпарат министрлігінің қолдауымен «Бірге шырқайық» концерті өтеді, – деп хабарлайды aqshamnews.kz тілшісі.
Кеште Роза Бағланова атындағы «Қазақконцерт» мемлекеттік академиялық концерттік ұйымының әртістері мен Құрманғазы атындағы Қазақ мемлекеттік академиялық халық аспаптар оркестрі бір сахнада бас қосады.
Концертте қазақ эстрадасының бірнеше буынға танымал әндері халық аспаптары оркестрінің сүйемелдеуімен орындалады. Оркестрге дирижер Абылай Тілепберген жетекшілік етеді. Сондай-ақ бағдарламада «Қазақконцерт» өнерпаздары мен шығармашылық ұжымдарының орындауындағы туындылар ұсынылады.
Сахнада Қазақстанның халық әртістері Алтынбек Қоразбаев пен Мақпал Жүнісова, ҚР еңбек сіңірген қайраткерлері Жеңіс Ысқақова, Жанна Орынбасарова және Дильназ Ахмадиева, ҚР мәдениет қайраткері Бибігүл Қилымхан, халықаралық байқаулардың лауреаттары Нұрғалым Аманбай, Ербол Нариманұлы, сондай-ақ «Azia» және «Melomen» топтары өнер көрсетеді,
«Бірге шырқайық» кешінде ұлттық аспаптардың үні мен эстрадалық әндер тоғысады. Көрермендер сүйікті шығармаларын оркестр сүйемелдеуімен тыңдап, өнерпаздармен бірге шырқай алады.
Өтетін уақыты: 30.09.2026 жыл, сағат 19:30
Өтетін орны: Алматы қаласы, Абылай хан даңғылы, 83;
Құрманғазы атындағы концерт залы