«Алмалы» кітапханасында Қазақстан халқы тілдері күніне орай Алматы қаласы мектептеріндегі өзге ұлт оқушылары арасында «Қазақ тілі – қазығым» байқауы ұйымдастырылды. Байқауға қазақ тілін еркін меңгерген өзге ұлт өкілдерінің 8-10 сынып аралығындағы мектеп оқушылары қатысты. 
- Бүгін Қазақстан халқы тілдері күніне орай Алматы қаласы Қоғамдық даму басқармасының «Қоғамдық келісім» мекемесі «Қазақ тілі – қазығым» атты байқау ұйымдастырып отыр. Байқаудың мақсаты – қазақстандық этностардың мемлекеттік тілді меңгерген жас өкілдерін анықтау, қолдау және ынталандыру, мемлекеттік тілді насихаттау. Іс-шараға Алматы әр ауданынан келген 20-ға жуық оқушы қатысып жатыр, – деді әділқазылар алқасының мүшесі Балнұр Асқарқызы.
Сондай-ақ ол қазақ тіліне арналған байқаудың үш кезеңнен тұратынын атап өтті.
- Бірінші кезеңде оқушылар қазақ тілінде өздерін шығармашылық жағынан таныстырады. «Өнер алды қызыл тіл» деген екінші кезеңде қатысушылар қазақ ақын-жазушыларының туындысын жатқа айтып береді. Үшінші кезеңде берілген мақал-мәтелдерді толықтырып жазу керек. Жалпы байқау нәтижесі бойынша үш 3-орын, екі 2-орын, бір 1-орын алған қатысушылар бағалы сыйлықтармен марапатталады, – деді Балнұр Асқарқызы.
«Қазақ тілі – қазығым» байқауына қатысқан Самуэль мемлекеттік тілді үш жылдан бері үйреніп жүргенін айтты.
- Менің жасым 13-те. Мен қазақ жерінде туылғам. Бірақ қазақ тілін үйреніп жүргеніме 3 жыл болды. Қазіргі дейін тілді біраз үйреніп қалдым. Бүгін Абай Құнанбайұлының шығармашылығын оқып, дайындалып келдім, – деді Самуэль Усорох.