Алаш арыстары және «Қазақ» газетінің әр жылдардағы жарыққа шыққан басылымдарынан кітап көрмесі ұйымдастырылды.
Бүгін ҚР Ұлттық кітапханасының Н. Дәулетова атындағы залында «Қазақ» газетінің 110 жылдығына арналған «Ұлт рухын асқақтатқан басылым» атты республикалық конференция өтті, деп хабарлайды Almaty-akshamy.kz.
Шараны Қазақстан Республикасы Ақпарат және қоғамдық даму вице-министрі Ысқақов Қанат Жұмабайұлы құттықтау сөзбен ашып, ХХ ғасырдың басындағы қазақ халқының тарихы мен мәдениетінің айнасына айналған «Қазақ» газетінің тарихына тоқталып, сол сара жолды жалғастырушы буынға алғысын білдірді.
Жиын барысында тарих ғылымдарының докторы Мәмбет Қойгелді; Қазақстан журналистер академиясының президенті, тарих ғылымдарының докторы Сағымбай Қозыбаев, журналист, қоғам қайраткері Әбдіжәлел Бәкір, тарих ғылымдарының докторы, профессор Ханкелді Әбжанов, қоғам қайраткері, жазушы-публицист Марат Тоқашбаев, «Қазақ» газетінің құрылтайшысы Махмұт Нәлібаев сөз сөйледі.
Сонымен қатар, филология ғылымдарының докторы, профессор Бағдан Момынова «Қазақ» газеті - төте жазу, емле алғаш сыналған Алаш үні» тақырыбында, А.Байтұрсынұлы музей-үйінің жетекшісі, ахметтанушы Райхан Имаханбет «Қазақ» газеті – ұлттық болмыстың көшбасшысы» тақырыбында, әдебиет сыншысы, алаштанушы-ғалым, «Дарын» мемлекеттік жастар сыйлығының иегері Елдос Тоқтарбай «Ұлт рухын асқақтатқан басылым» тақырыбында, тарих ғылымдарының докторы Светлана Смағұлова «Қазақ» газеті және ұлт зиялылары» тақырыбында баяндама жасады.
«Арыс» баспасының директоры, филология ғылымдарының докторы Ғарифолла Әнес «Қазақ газетінің 1913-1918 жылдардағы топтамасын араб әліпбиінен қазіргі жазу үлгісіне көшіріліп, жарық көрген кітаптармен таныстырды.
Шара аясында Қазақстан Республикасының Ұлтық кітапханасы қорынан Алаш арыстары жайлы және «Қазақ» газетінің әр жылдардағы жарыққа шыққан басылымдарынан кітап көрмесі ұйымдастырылды.
Іс-шара соңында Алаш арыстарының аманаты, ұлт айнасына айналған «Қазақ» газетінің дамуына зор үлес қосқан сала қызметкерлеріне ҚР Ақпараттық және қоғамдық даму министірлігінің «Ақпарат саласының үздігі» төсбелгісі, Құрмет грамоталары және «Қазақ газетіне 110 жыл» мерейтойлық төсбелгісі табысталды.